Фаластинни қўллаб-қувватлаш бўйича ноқонуний митингда қатнашгани учун Тошкентда уч киши ҳибсга олинди

Тошкентда 29 октябрь куни Фаластинни қўллаб-қувватлаш бўйича рухсат этилмаган митингда қатнашгани учун уч киши маъмурий жавобгарликка тортилди. «Газета.uz» нашри буни Жиноят ишлари бўйича Шайхонтоҳур туман судининг қарорларини ўрганиб чиқиб, аниқлаган.

«Газеты.uz» маълумотларига кўра, акцияга чақирувлар ижтимоий тармоқларда бир неча кун аввал пайдо бўлган. Фаоллар Истанбулда Фаластинни қўллаб-қувватлаш митинги учун қилинган баннердан кўчирилган баннерни тайёрлаган. Баннерда Амир Темур ҳайкали ва унинг атрофида йиғилган, қўлларига Ўзбекистон ва Фаластин байроқларини кўтариб олган кўплаб одамлар тасвирланган. Унда вақт ва жой ҳам кўрсатилган: 14:00, Амир Темур хиёбони.

Баннернинг пастки қисмида «Фаластин билан елкама-елка», «15 сутка мени қўрқитмайди» ва «Кўпчилик бўлсак, бизни эшитишади» деган ёзувлар бўлган.

Жиноят ишлари бўйича Шайхонтоҳур тумани судининг 30 октябрдаги қарорлари билан уч нафар шахс — Тошкент вилоятининг Оҳангарон туманида яшовчи 2001 йилда туғилган Ф.О. ва Б.И. (2001 йил), шунингдек, Қашқадарё вилояти Косон туманидан М.Х. (1997 йилда туғилган)га нисбатан маъмурий жавобгарлик тайинланган.

Уларга нисбатан Маъмурий жавобгарлик тўғрисидаги кодекснинг 194-моддаси (Ички ишлар органлари ходимининг қонуний талабларини бажармаслик), 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш) ва 201-модданинг 1-қисми (Йиғилишлар, митинглар, кўча юришлари ёки намойишлар уюштириш, ўтказиш тартибини бузиш) билан маъмурий баённомалар тузилган.

Ҳужжатга кўра, 29 октябрь куни Амир Темур хиёбонида бўлиб ўтган ноқонуний митинг ҳақидаги маълумотлар Telegram`даги очиқ гуруҳда эълон қилинган. Суд жараёнида сўзга чиққан Ф.О. ушбу постларни ўқиб чиққанини ва акцияда иштирок этиш учун Оҳангарон туманидан Тошкентга келганини тан олган.

“Ҳуқуқ-тартибот идоралари уни митингда қатнашаётган вақтида қўлга олиб, шахсини аниқлаш ва профилактик суҳбат ўтказиш учун ички ишлар бўлими биносига олиб борган”, – дейилади хабарда.

У қилмишидан афсусда эканини айтиб, бундай ҳолат бошқа такрорланмаслигини айтиб, суддан жазони енгиллаштиришни сўради.

Яна икки шахс ҳам Telegram гуруҳидаги постларни ўқиб, ноқонуний митингда қатнашганини маълум қилган.

Суд Маъмурий жавобгарлик тўғрисидаги кодекснинг 194-моддаси (Ички ишлар органлари ходимининг қонуний талабларини бажармаслик) ва 201-модданинг 1-қисмини (Йиғилишлар, митинглар, кўча юришлари ёки намойишлар уюштириш, ўтказиш тартибини бузиш) тўғри квалификацияланган деб топди, 195-модда (Ички ишлар органлари ходимларининг ўз хизмат бурчларини бажаришларига қаршилик кўрсатиш)ни эса истисно қилди.

Уларнинг учаласига ҳам 15 сутка маъмурий қамоқ жазоси тайинланди.

«Газета.uz» манбалари 100 дан ортиқ одам ҳибсга олингани ҳақида хабар берди. Акцияда иштирок этиш учун нафақат шаҳар аҳолиси борган, балки қўшни вилоятлардан ҳам пойтахт марказига етиб келишган.