Гонконгда 45 мухолифатчи 10 йилгача қамоқ жазосига ҳукм қилинди

Гонконг суди 2019-йилда демократия тарафдори бўлган норозилик намойишларининг 45 нафар етакчисига ҳукм чиқарди. Улар 4 йилдан 10 йилгача қамоқ жазосига ҳукм қилинди, деб хабар беради Реутерс.

Энг юқори жазо «инқилобга» чақиришда айбланган собиқ ҳуқуқ профессори Бенни Тай учун 10 йиллик қамоқ жазоси эди. Намойишчиларнинг яна бир етакчиси Жошуа Вонг 4 йилу 8 ой қамоқ жазосига ҳукм қилинди. Ўз айбига иқрор бўлгач, унинг жазо муддати учдан бирига қисқартирилди.

Суд яна тўрт нафар фаолни, жумладан Австралия фуқароси Гордон Нгни норозилик намойишлари ташкилотчилари деб кўрсатди ва уларни етти йилу уч ойгача қамоқ жазосига ҳукм қилди.

Ҳукм қилинганлар 2021-йил 6-январда бир йил аввал қабул қилинган Миллий хавфсизликни ҳимоя қилиш тўғрисидаги қонунга биноан ҳибсга олинган, кейинчалик “Гонконг 47” номи билан машҳур бўлган 47 киши орасида.