Қирғизистон-Ўзбекистон чегарасида 2010 йилдан буён ёпиқ бўлган иккита назорат-ўтказиш пункти очилди

Қирғизистон-Ўзбекистон чегарасида 1 сентябрдан бошлаб «Қара-Бағиш» ва «Бек-Абад» назорат-ўтказиш пунктларининг фаолияти тикланди. Бу ҳақда Kloop нашри Қирғизистон чегара хизматига таяниб ёзади.

Ушбу назорат пунктлари 2010 йилдан буён ёпиқ эди.

Чегара хизмати маълумотларига кўра, «Қара-Бағиш» назорат-ўтказиш пункти Ўш вилоятининг Аравон туманида жойлашган. Ундан фақат Қирғизистон ва Ўзбекистон фуқаролари пиёда ўтишлари мумкин.

«Бек-Абад» назорат-ўтказиш пункти Жалолобод вилоятининг Сузоқ туманида жойлашган. “Қара-Бағиш”дан фарқли ўлароқ, у орқали учинчи давлат фуқаролари киришлари ҳам мумкин.

“Қирғизистон Республикаси Миллий хавфсизлик давлат қўмитаси Чегара хизмати Қирғизистон ва Ўзбекистон ҳукуматлари ўртасида эришилган келишувлардан сўнг назорат-ўтказиш пунктлари фаолиятини қайта тиклаганини эслатади”, — дейилади идора хабарида.

2023 йилнинг май ойида ижтимоий тармоқларда Ўзбекистон ва Қирғизистон чегарасида ўзбек томони деворни бузаётгани акс этган видео пайдо бўлган эди. Қирғизистон Чегара хизматининг 24.kg нашрига маълум қилишича, Ўзбекистон томони «Бек-Абад-Хонобод» назорат-ўтказиш пункти инфратузилмасини тиклашга киришган.

“Хонобод назорат-ўтказиш пункти 2010 йилда Ўзбекистон томонидан бир томонлама ёпилган эди. Шунингдек «Бек-Абад» назорат-ўтказиш пунктининг фаолияти ҳам тўхтатилганди. Назорат-ўтказиш пунктлари фаолиятини қайта тиклаш бўйича яқинда имзоланган икки томонлама келишувлардан сўнг уларни қайта тиклаш бўйича барча ишлар амалга оширилди. Худди шундай ишлар бугун ҳам ўзбекистонлик ҳамкасбларимиз томонидан амалга оширилмоқда”, — дейилади вазирлик хабарида.

Чегараларни делимитация ва демаркациялаш

Ўзбекистон 2010 йилдаги инқилобдан кейин Қирғизистон билан чегарадаги аксарият назорат-ўтказиш пунктларини бир томонлама ёпган эди.

2010 йил июнь ойида Қирғизистон жанубида миллатлараро можаро бошланганида чегара очилди. Тўқнашув пайтида 400 дан ортиқ одам ҳалок бўлди. Кейин Ўзбекистон Қирғизистондан 1000 дан ортиқ қочқинни ўз мамлакатига киритди. Кейин чегара яна ёпилди.

Қирғизистон ва Ўзбекистон ўртасида 15 та чегара ўтказиш пункти мавжуд. Аммо шу пайтгача бор-йўғи тўққизта назорат-ўтказиш пункти фаолият кўрсатган.

2023 йил бошида Қирғизистон ва Ўзбекистон чегараларни делимитация қилиш жараёнини якунлади. Бироқ музокаралар жанжал билан якунланди. Хусусан, Қирғизистонда Кампиробод сув омборини Ўзбекистонга бериш масаласи қизғин муҳокама қилинди.

Қирғизистоннинг айрим фаоллари ва сиёсатчилари сув омборининг берилишига қарши чиқди, бунинг натижасида улардан 30 га яқини 2022 йил октябрь ойида ҳибсга олинди. Уларнинг барчаси оммавий тартибсизликларни уюштиришга тайёргарлик кўрганликда айбланган.

Мазкур иш бўйича айбланувчиларнинг бир қисми ҳамон Бишкекдаги “1-СИЗО” ҳибсхонасида сақланмоқда, баъзилари эса уй қамоғига қўйиб юборилган.