“Юксалиш”: Ҳукумат энергетика секторидаги стратегияни эълон қилиши керак

Мамлакат энергетика тизими бундай синовларга тайёр эмаслигини кўрсатди. «Юксалиш” умуммиллий ҳаракати фуқароларнинг бу борадаги фикрларига таяниб, масъул давлат идораларини белгиланган ҳароратдаги иссиқлик, иссиқ сув, электр энергияси ва газ (шу жумладан, ҳисоблагичлари бўлмаган истеъмолчилар) таъминланмаган барча кунлар учун аҳоли билан қайта ҳисоб-китоб қилишга чақирди.

Энергетика вазирлиги қишга тайёрланганлик ҳолати ҳақида ахборот бериши мақсадга мувофиқ: навбатдаги энергетика инқирози нима учун юз берди, улар бу муаммони қандай ҳал қилмоқда, бундай ҳолат яна такрорланмаслиги учун нималар қилинмоқда? Ҳукуматнинг энергетика соҳасидаги стратегияси эълон қилиниши керак.

«Энергосамарадорликни ошириш, муқобил энергия манбаларига ўтиш, қайта тикланувчи энергия манбаларини кенг жорий этиш учун зарур ташкилий ва инфратузилмавий шароитлар яратиш бўйича кўрилаётган чоралар юзасидан жамоатчилик муҳокамасини ўтказиш лозим.  Муқобил энергия манбаларининг кенг ривожланишига нималар тўсқинлик қилаётганлигини очиқ муҳокама қилиш учун экспертларни, давлат расмийларини таклиф қилиб, жамоатчилик фикрини ўрганиш зарур. «Юксалиш» умуммиллий ҳаракати бу масалада мулоқот майдони бўлишга тайёр».

Қишнинг совуқ кунлари яна 2-3 ҳафта сақланиб қолишини инобатга олиб, ҳаракат қуйидаги тезкор чораларни кўришни таклиф этган:

1. Заруратга кўра жойларда одамларга исиниш, телефон ва бошқа қурилмаларни зарядлаш, чўмилиш, овқат пишириш мақсадида келишлари учун иссиқ сув ва электр энергияси узлуксиз таъминланган иситиладиган хоналарни тайёрлаш.
2. Расмий маълумотларга бўлган эҳтиёжни таъминлаш. Кунига камида бир-икки маротаба энергия тизими раҳбарлари жонли эфирга чиқишлари керак (телевидение, радио, интернет орқали), яъни вазиятни яхшилаш учун аниқ нима қилинганлиги, қандай бахтсиз ҳодисалар бартараф этилганлиги, қаерда муаммолар сақланиб қолаётганлиги ва уларни бартараф этиш муддатлари ва кўрилаётган чоралар ҳақида брифинглар ўтказиши керак.
3. Фуқаролар мурожаатларини қабул қилиш учун кўп функцияли колл-марказни ишга тушириш. Айни кунларда тегишли масъул тузилмаларнинг “Ишонч телефони”да жиддий камчиликлар мавжуд бўлиб, линиялар ҳаддан ташқари юкланганлиги ёки оддийгина жавоб берилмаётганлиги маълум.