Кампирободни ҳимоя қилиш қўмитаси Ўзбекистон президентидан келишув имзоланишини кейинга қолдиришни сўрамоқда

«Кампирободни ҳимоя қилиш қўмитаси» Ўзбекистон президенти Шавкат Мирзиёевни Қирғизистон билан чегарада жойлашган сув омбори бўйича келишув имзоланишини кечиктиришга чақирди. Бу ҳақда Kloop нашри ёзади.

«Биз, Кампир-Обод/Андижон сув омбори яқинидаги қишлоқлар аҳолиси манфаатларини ифода этувчи Қирғизистоннинг бир гуруҳ нуфузли жамоат ва сиёсат арбоблари ушбу стратегик, халқларимиз учун ҳаётий муҳим сув ресурслари атрофидаги муаммоли ва мунозарали масалалар ҳал этилгунга қадар президент Садир Жапаров билан келишувни имзолашни кечиктириш илтимоси билан Сизга мурожаат қиламиз», — дейилади мурожаатда.

Мурожаат муаллифлари икки давлат ўртасида тузилаётган келишувнинг бир қисми бўлган баъзи ҳужжатлар «Қирғизистон Республикасининг конституциявий нормалари, ўрнатилган қонунлари, сиёсий асослари ва демократик ютуқларини қўпол равишда бузиш билан ўтказиб юборилганини» таъкидлайди.

Хусусан, қайд этилишича, сув омборига эгалик масаласи Қирғизистон Жогорку Кенеши (парламенти)нинг Халқаро ишлар, мудофаа, хавфсизлик ва миграция қўмитаси томонидан бор-йўғи икки марта муҳокама қилинган. Шу билан бирга, муҳокама ёпиқ режимда ўтган, депутатларга масала юзасидан тўлиқ маълумот берилмаган.

«Фуқаролар ўз ерининг эгаси сифатида икки Президент ўртасида имзоланадиган ҳужжатлар эълон қилинишини талаб қилишга ҳақли, чунки гап икки давлатнинг узоқ муддатли манфаатлари ҳақида кетмоқда», — дейди мурожаат муаллифлари.

Улар Кампирободнинг Ўзбекистонга берилишига қарши чиққан фуқаролик жамияти вакиллари, сиёсатчилар, фаоллар ва ҳуқуқ ҳимоячиларининг оммавий ҳибсга олинганини эслатганлар.

«Биз ҳокимиятнинг репрессив ҳаракатларига кескин норозилик билдирамиз ва келажакда янги можароларга йўл қўймаслик учун чегара масалаларини жамоатчилик билан муҳокама қилиш ва келишиб олиш керак, деб ҳисоблаймиз», -дейди «Кампир Ободни ҳимоя қилиш қўмитаси» аъзолари.

Улар Ўзбекистон ва Қирғизистон раҳбариятини «Кампир-Обод/Андижон сув омбори икки давлат ўртасидаги жанжал эмас, балки фаровонлик манбаи бўлиши учун уни биргаликда бошқариш масалалари ва оқибатларини ҳал қилишда янада эҳтиёткор ва мувозанатли ёндашишга чақиради.

Кемпиробод сув омбори бўйича келишув

Кампиробод сув омборининг берилиши – бу Давлат чегараларини демаркация қилиш ва делимитация қилиш комиссиясига раҳбарлик қилаётган Давлат Миллий хавфсизлик қўмитасининг раҳбари Қамчибек Ташиевнинг ташаббуси.

Депутатлар бир неча ҳафтадан бери Кампиробод сув омборини Ўзбекистонга ўтказишга рухсат берувчи ҳужжатларни муҳокама қилиб, кўриб чиқмоқда.

Бу мунозараларнинг барчаси жанжал билан кечмоқда – аввалроқ депутатлар ўз ҳамкасблари Чингиз Айдарбековни қўмита раҳбари лавозимидан четлатган эдилар. У сув омбори пастидаги ерларни Ўзбекистонга беришни назарда тутувчи келишувга қарши чиққанди.

Умуман олганда, муҳокама қилинаётган ҳужжатлар сув омбори жойлашган Боткен вилоятида ҳам, Ўш ва Бишкекда ҳам бир қанча митинг ва қурултойларга сабаб бўлди.

Расмийлар тартибсизликларни уюштирганликда айблаб 26 кишини ҳам ҳибсга олди. Уларнинг барчаси Садир Жапаров ва Қамчибек Ташиевни сув омборини қўшниларига берганини танқид қилишганди.