Мбаппе Мадриднинг “Реал” клубига ўтди

Душанба куни “Реал Мадрид” франциялик ҳужумчи Килиан Мбаппени кейинги беш мавсум учун сотиб олганини расман эълон қилди.

Бироқ футболчининг янги клубидаги тақдимоти Франция терма жамоаси ёзда Германияда бўлиб ўтадиган Европа чемпионатидаги ўйинидан кейингина бўлиб ўтади.

Бу баёнот “Реал Мадрид” Лондондаги “Уэмбли” стадионида бўлиб ўтган финалда дортмундлик “Боруссияни” 2:0 ҳисобида мағлуб этиб, ўзининг 15-Еврокубогини қўлга киритганидан икки кун ўтиб эълон қилинди.

25 ёшли Мбаппе май ойида ПСЖни тарк этишини расман эълон қилган ва февраль ойида клубни хабардор қилган.

У 2017 йилда 180 миллион евро эвазига Париж жамоасига ўтган ва 256 та гол уриб, ПСЖ рекордчисига айланганди.