НАТОнинг энг йирик машқларида 90 минг ҳарбий қатнашади

90 000 га яқин аскар НАТОнинг сўнгги ўн йилликлардаги энг йирик Steadfast Defender  машғулотларида қатнашади. Бу ҳақда НАТОнинг Европадаги бирлашган қуролли кучлари бош қўмондони Кристофер Каволи маълум қилди, деб ёзади Reuters.

Унинг айтишича, машғулотлар келаси ҳафта бошланиб, май ойига қадар давом этади.

“Альянс Шимолий Америкадан Атлантика океани бўйлаб куч олиб кириш орқали Евро-Атлантика минтақасини мустаҳкамлаш қобилиятини намойиш этади”, – деди Каволи.

Bild нашрининг қайд этишича, НАТО охирги марта 1988 йилда бундай кенг кўламли машғулотлар ўтказган. Кейин уларда 125 минг ҳарбий хизматчи қатнашди.

Financial Times  газетасининг ёзишича, НАТОнинг 2024 йилда ўтказиладиган Steadfast Defender  машғулотлари Совуқ Урушдан кейинги энг каттаси бўлади. Газетанинг ёзишича, улар Германия, Польша ва Болтиқбўйи мамлакатлари ҳудудлари орқали ўтади. Машқлар 500 дан 700 гача жанговар ҳаво парвозларини ва 50 дан ортиқ кемаларнинг манёврларини ўз ичига олади. Кейин уларда 41 мингдан ортиқ ҳарбий хизматчи иштирок этиши маълум қилинди.

Машқлар сценарийси НАТО қўшинлари альянс аъзоларидан бирига нисбатан Россиянинг тажовузкорлигини қайтаришни назарда тутади, деб ёзади FT. Симуляция қилинган душман – Россия бошчилигидаги коалициядир. Машқларда НАТО аъзоларидан ташқари альянсга аъзо бўлиш учун ариза берган Швеция ҳам иштирок этади.

15 январь куни Германиянинг Bild таблоид нашри Германия Мудофаа вазирлигидан махфий ҳужжат олгани, унга кўра Германия 2025 йилда Россия НАТОнинг шарқий қанотига ҳужум қилиши мумкин бўлган сценарийни кўриб чиқаётгани ҳақида хабар берганди. НАТОнинг Стратегик алоқалар бўйича етакчи тажриба маркази директори Жанис Сартс, Bild  нашри томонидан эълон қилинган сценарий махфий разведка таҳлили эмас, балки машқлар режаси эканлигини таъкидлади.