Президент 1 октябрдан Tax Gap амалиёти бекор қилинишини билдирди

Ўзбекистонда 1 октябрдан ҚҚСни қайтаришда солиқ узилиши коэффициентини қўллаш (tax gap) тизими бекор қилинади. Бу ҳақда президент Шавкат Мирзиёев 18 август куни тадбиркорлар билан учрашувда маълум қилди, деб ёзади «Газета.uz» нашри.

Бундан ташқари, ҚҚС тўловчиси гувоҳномасини вақтинчалик тўхтатиб туриш амалиёти бекор қилинади.

Шу билан бирга, Савдо-саноат палатаси ва бизнес-омбудсман соҳа вакиллари билан биргаликда тадбиркорлар учун очиқлик рейтингини жорий этади.

2024 йил 1 январдан юқори рейтингга эга бўлган корхоналар барча турдаги текширувлардан озод этилди. Уларга кун давомида тўланган ҚҚСнинг ортиқча қисми қайтарилади.

“Ўйлайманки, бу адолатдан бўлади”, – дейди давлат раҳбари.

Солиқ узилиши деганда солиқ тўловчи томонидан солиқ ҳисоботида етказиб берувчилар-контрагентлардан олинган ҳисобварақ-фактуралар асосида ҳисобга олиниши лозим бўлган ҚҚС суммаларининг акс эттирилиши тушунилади. Бунда ушбу операциялар бўйича кўрсатилган контрагентлар бюджетга ҚҚС тўламаган, ушбу операцияларни ўзларининг ҳисобварақ-фактураларида акс эттирмаган ёки солиқ органларига солиқ ҳисоботларини тақдим этмаган бўлади.