Қон босимини қандай меъёрлаштириш мумкин

Доимий жисмоний фаоллик юқори қон босими хасталигига чалинган беморлар учун фойдали машғулот ҳисобланади. Чунки ўртача интенсивликдаги машқлар таъсири остида организмда “давления” меъёрлашади.

Тавсия этилади: терапевтик машқлар, пиёда юриш, сузиш, велосипед учиш. Улар организмнинг чидамлилигини ошириб, умумий периферик қон томирлари қаршилигини камайтиради.

Шуни ёдда тутиш керак:

• статик жисмоний фаолият (оғирлик кўтариш ва уни ушлаб туриш, узоқ вақт тик оёқда туриш ёки ўтириш) қон босимини ошириши мумкин. Шу боис улардан қочиш;
• бош ва танани ён томонларга буришда эҳтиёт бўлиш;
• тананинг ҳаддан зиёд қизиб кетмаслиги учун жисмоний машғулотларни эрталаб тонгда бажариш лозим.

Оптимал машғулот режими:

• ҳафтада 4-5 марта 20-30 дақиқа ёки ҳафтада 2-3 марта 40-60 дақиқа.

Жисмоний фаолиятга қарши кўрсатмалар:

• қон босими кескин ошганда (гипертоник криз) ва ундан кейинги эрта давр;
• саломатликнинг ёмонлашуви билан қон босимининг сезиларли даражада пасайиши;
• юқори қон босимининг 3-даражаси;
• юрак ритмининг бузилиши каби жиддий асоратлар.

Жисмоний машғулотлар вақтида нафас қисиши, кўкрак қафаси ва юрак соҳасида оғриқлар, юрак фаолиятида бузилишлар пайдо бўлганда машқларни дарҳол тўхтатиш ва шифокор билан маслаҳатлашиш лозим.