Тошкент вилоятида ўз рафиқасини жонига қасд қилишгача етказган фуқарога ҳукм чиқарилди

13 август куни Тошкент вилоятида хотинини ўз жонига қасд қилишгача олиб борган эркак қамоққа олинди, дея хабар беради Олий суд матбуот котиби Азиз Абидов.

У жиноят содир этишда айбдор деб топилиб, ҳукм устидан шикоят қилиш ҳуқуқи билан 9 йил муддатга умумий тартибли колонияга ҳукм қилинди.

27 март куни соат 21:30 ларда Тошкент вилояти Бекобод тумани Далварзин маҳалласида 28 ёшли аёл ўзи яшайдиган уйнинг бешинчи қаватидан сакраб ўз жонига қасд қилган. Дастлабки маълумотларга кўра, икки фарзанднинг онаси турмуш ўртоғининг мунтазам калтаклаши ва камситишларига чидай олмай, ўз жонига қасд қилишга қарор қилган.

Илгари унга учта ҳимоя ордери берилган. Қайд этилишича, фожиадан бир неча кун олдин эркак уни ҳаммасини янгидан бошлаш баҳонасида ота-онасининг уйидан олиб кетган.

Кейинроқ ҳуқуқ-тартибот идоралари ходимлари эркакни қўлга олиб, унга нисбатан 103-модда (Ўз жонига қасд қилишга ундаш) билан жиноят иши қўзғатган.