“Янги Ўзбекистон” боғида 10 000 та пластик ўрдакчалар тепадан туширилиши ҳақидаги хабарга муносабат билдирилди

Ижтимоий тармоқларда “Янги Ўзбекистон” боғида 10 000 та пластик ўрдакчалар туширилмоқчи эканлиги ҳақида хабар тарқалди.

Хабарга кўра, “Экология, атроф-муҳитни муҳофаза қилиш ва иқлим ўзгариши вазирлиги бундай хатти-ҳаракатларни кескин қоралайди ва бундай ҳолатлар қонунга кўра жавобгарликка сабаб бўлади”.

Ҳолат юзасидан вазирлик томонидан воқеа жойига чиқилиб, тушунтириш ишлари олиб борилган. Бундай хатти-ҳаракатлар “Табиатни муҳофаза қилиш тўғрисида”ги ва “Чиқиндилар тўғрисида”ги қонунларни қўпол равишда бузиш ҳисобланиши ҳамда жавобгарликка сабаб бўлиши тушинтирилган.

“Вазирлик истироҳат боғлари, дам олиш масканлари мутасаддиларини экологияга зарар келтирадиган хатти-ҳаракатларни амалга оширмасликка чақиради. Шунингдек, блогерлар, вайнерлар, ижтимоий тармоқлар фаолларидан табиатни асраб-авайлашга қаратилган ғояларни тарғиб қилишни, бу мавзуларда ижтимоий роликлар тайёрлашни сўрайди. Вазирлик бу борада уларга кўмак беришга тайёр”, – дейилади хабарда.