Ўзбекистон яна Сўх газ омборидан газ олиши мумкин

Ўзбекистон Фарғона водийсини газ билан таъминлаш мақсадида Сўх вилоятидаги (Шимол-Сўх газ омбори) ер ости газ омборини қайта очишни режалаштирмоқда. Бу ҳақда Президент Шавкат Мирзиёев 1 февраль куни Андижон вилоятида аҳоли билан учрашувда маълум қилди, деб ёзади «Газета.uz».

“Афсуски, Сўхдаги ер ости газ омбори маълум сабабларга кўра ёпилди. Биз Қирғизистонга давлат ташрифи чоғида [Қирғизистон Президенти] Садир Жапаров билан бу борада ҳам келишиб олдик. Тез орада энергетика вазиримиз Қирғизистонга бориб, [лойиҳанинг] техник жиҳатларини келишиб олади”, — деди у.

Энергетика вазири Жўрабек Мирзамахмудов ер ости омборлари ҳажми 2,5-3 млрд. кубометр эканини маълум қилди.

“Улардан 1,3 миллиард кубометр газ фойдаланилиши мумкин, қолгани эса – буфер зонада. Демак, қиш мавсумида водийга ҳар куни 13 миллион кубометр газ етказиб бериш имкониятига эга бўламиз”, — деди Энергетика вазирлиги раҳбари.

Газ омборининг асосий қисми Қирғизистон ҳудудида, компрессорлар эса Ўзбекистон ҳудудида жойлашган. Шу сабабдан мамлакатлар ўртасида объектдан умумий фойдаланиш бўйича музокаралар олиб борилмоқда.

“Бино кўп йиллардан бери фойдаланилмаётгани боис унинг ҳозирги ҳолатини синчиклаб ўрганишимиз керак. Шундан сўнг, шартлар мувофиқлаштирилади. Балки ижара асосида бўлар, аммо бирор нарса дейишга ҳали эрта”, — дейди энергетика вазири.