Ўзбекистон ҳудудларида жиноий фаолиятда гумон қилинган 100 дан ортиқ шахс ушланди

Ўзбекистоннинг тўрт вилоятида “кўча жиноий гуруҳлари” ва жиноий гуруҳларни аниқлаш бўйича ўтказилган кенг кўламли рейдлар доирасида жиноий фаолиятда гумон қилинган яна 124 нафар шахс қўлга олинди.

Хусусан, Бухоро вилоятида махсус бўлинма ходимлари томонидан қидирувда бўлган 31 нафар шахс қўлга олинди.

Тадбир давомида одам ўғирлаш ва талон-тарож қилишнинг 1 та, гиёҳвандлик воситалари ва психотроп воситаларининг ноқонуний айланиши билан боғлиқ 8 та, қонунга хилоф равишда қурол сақлаш бўйича 2 та ва бошқа 9 та жиноят ҳолатлари аниқланди. Уларга нисбатан Жиноят кодексининг 137 (Одам ўғирлаш), 164 (Ўғирлик), 168 (Фирибгарлик), 276 (Гиёҳвандлик воситаларини қонунга хилоф равишда олиш ва сақлаш), 251 (Кучли таъсир этувчи ёки заҳарли моддаларни қонунга хилоф равишда сақлаш) ва 248 (Ўқотар қуролларнинг ноқонуний айланмаси) моддалари билан жиноят ишлари қўзғатилган.

5 нафар гумондорга нисбатан қамоққа олиш тарзидаги эҳтиёт чораси белгиланди, 15 нафарига нисбатан бошқа эҳтиёт чоралари қўлланди.

Шунингдек, 98 нафар шахс билан профилактика ишлари олиб борилиб, “ҳудуддаги жиноятчилик ҳолатига салбий таъсир кўрсатган” 38 нафар фуқаро маъмурий қамоққа олинган.

Самарқанд вилоятида махсус хизмат ва ҳуқуқ-тартибот идоралари ходимлари томонидан жиноий гуруҳнинг 47 нафар аъзоси қўлга олинди. Улардан 6 нафарига нисбатан жиноят иши қўзғатилиб, 25 нафари маъмурий жавобгарликка тортилди.

Рейд давомида гумондорлардан гиёҳванд воситалари ва психотроп моддалар, шунингдек, совуқ қуроллар – кастетлар, “бита” ва бошқа буюмлар олиб қўйилди.

Тошкент вилоятида ўтказилган махсус тадбир доирасида жиноий гуруҳнинг 34 нафар аъзоси қўлга олинди. Уларнинг 11 нафарига нисбатан жиноят иши қўзғатилиб, 23 нафар фуқаро маъмурий қамоққа олинган.

“Ҳибсга олинганлардан 13 дона пневматик ва ов қуроллари, ўқ-дорилар ва электрошокерлар, пичоқлар, кастетлар ва “бита”лар олиб қўйилди”, — дейилади хабарда.

Шунингдек, наркотик моддаларнинг ноқонуний айланиши билан боғлиқ 50 дан ортиқ ҳолат аниқланган. 11 кг гиёҳвандлик воситалари ва 8703 дона психотроп ва кучли таъсир этувчи воситалар мусодара қилинган. Жиноят содир этиб, суд ва тергов органларидан яшириниб юрган 64 нафар шахс ушланган.

Андижон вилоятида ўтказилган тезкор-қидирув тадбирлари давомида жиноят оламининг 4 нафар вакили ҳам қўлга олинди, улардан бири муқаддам судланган. Улар оилавий зўравонлик, майда безорилик, чет эл валютасини ноқонуний олиш ёки ўтказиш билан боғлиқ жиноятларни содир этганликда гумон қилинмоқда.

Фуқаролардан ушбу шахслар ёки гуруҳ аъзоларининг ҳаракатларидан жабр кўрганлар бўлса, ички ишлар бўлимига 97-432-10-20 ёки 102 телефон рақамлари орқали ёки энг яқин ички ишлар бўлимига мурожаат қилиш сўралган. Ариза берувчининг шахсий маълумотлари махфийлиги кафолатланади.

Ҳудудларда тезкор-профилактика тадбирлари давом этмоқда.