Ўзбекистон ва Франция хавфсизлик ва иқтисодиёт соҳаларида сиёсий маслаҳатлашувларни олиб боришга келишиб олди

Шавкат Мирзиёевнинг 21-22 ноябрь кунлари ушбу мамлакатга расмий ташрифи чоғида Ўзбекистон ва Франция президентлари икки давлат ўртасида юқори даражадаги ҳар томонлама шериклик муносабатларини ривожлантиришга кўмаклашиш мақсадида Қўшма баёнот қабул қилди.

Ташриф давомида томонлар давлат хизмати, коррупцияга қарши курашиш, таълим, тадқиқотлар, фуқаролик авиацияси ва меросни асраб-авайлаш соҳаларида ҳамкорликка оид ўнга яқин шартнома имзолади. Томонлар ўзаро манфаатли масалалар, хусусан, хавфсизлик ва иқтисодиёт соҳалари бўйича, зарурат туғилганида тегишли вазирликларни жалб этган ҳолда, турли даражаларда сиёсий маслаҳатлашувлар ўтказишга тайёр эканликларини билдирдилар. Томонлар, шунингдек, парламентлараро ҳамкорликни ривожлантириш, икки мамлакат дўстлик гуруҳлари фаолиятини фаоллаштиришдан манфаатдор эканликларини таъкидладилар.

Таълим соҳасида томонлар таълим муассасалари ўртасидаги алоқаларни мустаҳкамлаш, шунингдек, ўқитувчиларнинг малакасини ошириш ва француз тилини ўргатиш йўналишларида ҳамкорликни янада ривожлантиришга келишиб олдилар. Фаолиятини қўллаб-қувватлашга қарор қилинган Тошкентдаги “Француз альянси” француз лицейи фаолиятини юқори баҳолаб, Самарқанд шаҳрида ҳам шундай лицей ташкил этишга ўз ҳиссасини қўшиш таклифини билдирдилар.

Томонлар 2022 йил 27-28 ноябрь кунлари Париж шаҳрида бўлиб ўтадиган II Франция-Ўзбекистон академик форуми ўтказилишидан мамнунлик билдирдилар.

Иқтисодий соҳада томонлар 2020-2030 йилларга мўлжалланган Франция-Ўзбекистон иқтисодий йўл харитасида кўрсатилган тармоқларда савдо алоқаларини ривожлантиришга келишиб олдилар. Ташриф доирасида энергетика, сув ресурсларини бошқариш, транспорт ва туризм соҳаларида қатор иқтисодий шартномалар имзоланди. Қишлоқ хўжалиги бўйича Ҳаракатлар дастурида ҳамкорликнинг келгуси йўналишлари ҳам кўриб чиқилади. Ўзбекистон томони француз инвесторларининг мамлакатга кириб келишига кўмаклашиш ва мавжуд тартибларни соддалаштириш учун зарур ёрдам кўрсатишга тайёрлигини билдирди.

Икки давлат раҳбарлари Франция ривожланиш агентлиги (АФД) фаолиятини ижобий баҳолади ва Ўзбекистонга давлат инвестицияларини қўллаб-қувватлаш бўйича 2022-2025 йилларга мўлжалланган стратегик шериклик тўғрисидаги битим имзоланганини олқишлади. Хусусан, яшил иқтисодиёт соҳасида бошланган ҳамкорликни давом эттириш ва Оролбўйи минтақасини ривожлантириш бўйича лойиҳаларни амалга оширишда ФАРда ҳамкорликдан манфаатдор эканликларини билдирди.

Томонлар туризм соҳасида, хусусан, сайёҳлик объектларини ривожлантириш соҳасида ҳамкорликни янада ривожлантиришга келишиб олди. Франция томони Ўзбекистоннинг 2023 йилда Хивада биринчи Европа Иттифоқи – Марказий Осиё туризм форумини ташкил этиш таклифини қўллаб-қувватлади.