Ўзбекистон ва Тожикистон нималар ҳақида келишиб олди: Эмомали Раҳмон ташрифининг якунлари

Ўзбекистон президенти Тожикистон президенти билан музокаралар якуни бўйича Абадий дўстликни мустаҳкамлаш ва иттифоқчилик тўғрисидаги “тарихий” декларация имзоланганини билдирди. Давлат раҳбари яна нималар ҳақида келишиб олгани ҳақида қуйида материалда берилади.

Шу йил 20 июнь кунидан бошлаб Тошкент-Душанбе йўналишида йўловчи поездининг қатнови йўлга қўйилади.

Томонлар янги транзит йўлакларини шакллантириш ва замонавий логистика инфратузилмасини яратиш, ҳаво, темир йўл транспорти ва автобуслар қатновини кўпайтириш, биргаликда агрокластерлар ва замонавий ишлаб чиқариш корхоналарини ташкил этиш, мева-сабзавот маҳсулотларини қайта ишлаш ва учинчи мамлакатлар бозорларига чиқишга келишиб олдилар.

Бундан ташқари, Ўзбекистон ҳар йили Тожикистон фуқаролари учун ажратиладиган таълим грантлари сонини кўпайтирмоқчи.

Манба: president.uz

Бундан ташқари, ҳукуматлар, вазирлик ва идоралар даражасида кўп қиррали Ўзбекистон-Тожикистон ҳамкорлигини янада кенгайтиришга қаратилган 11 та ҳужжат имзоланди, Жумладан:

– Саноат кооперацияси соҳасидаги ҳамкорликни янада мустаҳкамлаш ва кенгайтириш бўйича “йўл харитаси”;

– маданият вазирликлари ўртасида 2022-2023 йилларга мўлжалланган маданият ва санъат соҳаларидаги ҳамкорлик тўғрисида битим;

– Ўзбекистоннинг Жиззах вилояти ва Тожикистоннинг Сўғд вилояти ўртасидаги икки томонлама ҳамкорликни ривожлантириш бўйича “йўл харитаси”;

– Атроф-муҳитни муҳофаза қилиш ва сувдан оқилона фойдаланиш соҳаларида ҳамкорлик тўғрисида меморандум;

– Ипакчилик тармоғида ҳамкорлик тўғрисида меморандум.

Манба: president.uz

Тожикистон Президентининг ташрифи доирасида Зарафшон дарёсида Яван гидроэлектр станцияси қурилишини бошлаш маросими бўлиб ўтди. Президент Шавкат Мирзиёев ва президент Эмомали Раҳмон рамзий тугмани босиб, қурилишга старт бердилар. “Sputnik” нашрининг маълумотларига кўра, қуввати 320 мегаватт бўлган иккита электр станцияси қурилади, бироқ Ўзбекистон президентининг матбуот хизмати фақат битта электр станцияси ҳақидаги маълумотларни келтиради.