“Капиталбанк” “Ezgu Amal” жамғармасига 500 млн сўм хайрия қилди

“Капиталбанк” саратон ва бошқа оғир касалликларга чалинган болаларни қўллаб-қувватловчи “Эзгу амал” жамғармасига 500 миллион сўм хайрия қилди. Бу ҳақда банк 7 апрель куни ташкил топган кунининг йиллиги муносабати билан маълум қилди.

Тижорат субъектлари ва нотижорат ташкилотлари ўртасидаги ҳамкорлик ҳар икки томон жамиятнинг ҳаёт сифатини яхшилашга интилганда самарали бўлади. Ўзбекистондаги энг йирик хусусий банк ҳисобланган “Капиталбанк” 23 йилдан буён турли ижтимоий лойиҳаларни қўллаб-қувватлашга қаратилган фаол ижтимоий сиёсатни олиб бормоқда. “Эзгу Амал” жамғармасига хайрия қилиш ушбу сиёсат доирасидаги энг кўзга кўринган ва муҳим ишоралардан бирига айланди.

«Эзгу Амал» жамғармаси 2018 йилда саратон касаллигини даволашга муҳтож болаларга ёрдам бериш мақсадида ташкил этилган. Жамғарма саратон касаллигига чалинган болаларни даволашни молиялаштириш ва уларнинг оилаларини психологик қўллаб-қувватлаш бўйича фаол иш олиб боради. Жамғарма ўз фаолияти давомида 800 га яқин болага ёрдам берди, бу жисмоний шахсларнинг кўмаги ва йирик компаниялар билан ҳамкорлик туфайли амалга оширилди.

“Капиталбанк”нинг “Эзгу Амал” жамғармасини қўллаб-қувватлаши корпоратив ижтимоий масъулиятнинг муҳим жиҳати – жамиятнинг ижтимоий эҳтиёжларини кўра олиш ва уларга жавоб бериш қобилиятини намоён этади. “Эзгу Амал” жамғармаси билан ҳамкорлик нафақат кўплаб болалар ва уларнинг оилалари ҳаётини яхшилашга ёрдам беради, балки бошқа компаниялар учун фаол ижтимоий ҳаракатлар учун илҳом манбаи бўлиши мумкин.

“Эзгу Амал” жамғармаси жисмоний ва юридик шахслардан хайрияларни қабул қилади.

Сиз “Эзгу Амал” веб-сайтида, шунингдек, Uzum Bank, Click, Payme  тўлов тизимлари орқали хайрия ва онкологияга чалинган болаларни даволашга ёрдам беришингиз мумкин. Шунингдек, Korzinka супермаркетлар тармоғидаги хайрия қутилари орқали ҳамда бевосита жамғармага мурожаат қилиб, нақд пулда хайрия қилиш мумкин.