Бош прокуратура товар-хомашё биржасига нисбатан хизмат текширувини тайинлади

Бош прокуратура Anhor.uz материалидан сўнг “Ўзбекистон Республикаси товар-хомашё биржаси” АЖ хатти-ҳаракатлари юзасидан хизмат текширувини тайинлади. Аввалроқ биз виждонсиз етказиб берувчилар реестридан камида тўртта компания давлат харидларида иштирок этгани ҳақида ёзган эдик.

Таҳририят сўровига жавобан Бош прокуратура Давлат харидлари юзасидан шикоятлар бўйича комиссиянинг 2022 йил 26 сентябрдаги қарори билан 60 та хўжалик юритувчи субъект виждонсиз хўжалик юритувчи субъектлар реестрига киритилганини маълум қилди.

Шундан сўнг, 2022 йил 11 октябрда Иқтисодиёт ва Молия вазирлиги электрон давлат харидлари тизими операторларига, хусусан, “Ўзбекистон Республикаси Товар-хомашё биржаси” АЖга реестрга киритилган тадбиркорлик субъектларининг давлат харидларида иштирок этишини чеклаш бўйича кўрсатма юборди.

Кўрсатмага кўра, реестрга киритилган корхоналарнинг давлат харидларида иштирокини чеклаш бўйича дастурий-техникавий ишлар 2022 йил 14 ноябрга қадар амалга оширилган.

Ўрганиш ишлари шуни кўрсатдики, 11 октябрдан 14 ноябрга қадар Sadaf Biznes service, Nasim Bobo Qayumov, Sanoat universal, Afrosiyob Grand Textile корхоналари давлат харидларида иштирок этган.

Аммо кейинги таҳлиллар давомида Anhor.uz журналисти мазкур компаниялар қачон виждонсиз етказиб берувчилар реестрига киритилгани борасидаги тафовутларни аниқлади.

Ушбу давлат харидлари порталига кўра, Nasim Bobo Qayumov 2022 йил 26 сентябрда, бошқа порталга кўра эса 2021 йил 5 ноябрда реестрга киритилган. Sanoat universal билан боғлиқ вазиятда ҳам тафовутлар бор – блокировка бошланиши сифатида 2022 йил 10 март кўрсатилган,  Afrosiyob Grand Textile учун эса 2022 йил 17 январь деб белгиланган. Аввалроқ ушбу корхоналар реестрга 2022 йил 26 сентябрда киритилгани ҳақида ёзган эдик.

Реестрга киритилган турли саналарни саралаб олиб, Nasim Bobo Qayumov корхона виждонсиз етказиб берувчилар реестрига киритилган 6 ноябрдан 26 сентябрга қадар даврда 6,09 миллиард сўмлик шартномалар олганлигини аниқлаш мумкин бўлди. Эслатиб ўтамиз, ўтган сафар аниқланган шартномалар миқдори 1,09 млрд. сўмни ташкил қилганди.

Ўз навбатида, Sanoat Universal 2022 йилнинг 17 январидан 26 сентябрига қадар 242,6 миллион сўмлик шартномаларни олган.

Anhor.uz таҳририяти Бош прокуратурага вазиятга изоҳ бериш сўрови билан юборилган сўровга жавоб кутмоқда.

Дана Опарина