Жиззахда 17 ёшли йигит ҳаракатланаётган аттракциондан тушиб кетди (видео)

Ижтимоий тармоқларда Жиззах шаҳридаги “Ўрда” истироҳат боғида юз берган ҳодиса видеолари тарқалди, унда ўсмир йигит ҳаракатланаётган аттракциондан йиқилиб тушганини кўриш мумкин.

Мазкур ҳолат юзасидан Жиззах вилояти Фавқулодда вазиятлар бошқармаси ва профилактика инспекторлари томонидан ўрганишлар олиб борилган ва ушбу фуқаро билан суҳбат ўтказилган.

Аниқланишича, 1 июнь куни соат 20:00 ларда Пахтакор туманида яшовчи 2007 йилда туғилган фуқаро М.Ў оила аъзолари билан биргаликда Жиззах шаҳрида жойлашган “Ўрда экологик истироҳат боғи”га айланиш учун борган. Аттракционда учиш вақтида операторларнинг огоҳлантиришларига қарамасдан ўзининг эҳтиётсизлиги оқибатида яъни аттракцион тўлиқ тўхтамасдан олдин ҳимоя камарини ечиб юбориши натижасида йиқилган ва ҳеч қандай тан жароҳати олмаган. Таъкидланишича, мазкур ҳолат содир бўлган вақтда аттракционда носозликлар бўлмаган.