FT: Ғарб фирмалари Россиядан кетиш режаларидан воз кечмоқда

Россияни тарк этишини эълон қилган Ғарб компаниялари юзага келган муаммолар туфайли ўз режаларини ўзгартирмоқда. Бу ҳақда DW Financial Times нашрига таяниб хабар беради.

Avon Products, Air Liquide and Reckitt ва бошқа фирмалар Россияда бизнесни сотишдаги бюрократик тўсиқлар, шунингдек, ушбу мамлакатда истеъмолчилар фаоллигининг тикланиши туфайли қолмоқда.

Ғарб фирмалари активларини 90 фоиз чегирма билан сотишни хоҳламаяпти.

“Кўпгина Европа компаниялари икки ўт орасида қолган”, – деб ёзади FT Россияда Ғарб компаниялари билан ишлайдиган суҳбатдошининг сўзларини келтирган ҳолда.

Хорижий фирмалар Россиядаги корхоналарини сотиш ниятини эълон қилганидан сўнг, “уларга номақбул бўлган харидорларни танлаш имконияти берилди”, – дейди у. Газетанинг манбасига кўра, Россия Федерациясидан чиқиб кетиш компанияларни зудлик билан ноқулай нархларда 90% гача чегирма билан сотишни ўз ичига олади.

Нашр шунингдек, Киев Иқтисодиёт мактаби маълумотларининг маълумотларини келтиради, уларга кўра, уруш бошланганидан кейин Россияда 2100 дан ортиқ трансмиллий корпорациялар ўз фаолиятини давом эттирмоқда, 1600 га яқин халқаро компания Россия бозорини тарк этган ёки Россия Федерациясидаги фаолиятини чеклаган.

Россия Ғарб компанияларининг чиқиб кетиш нархини оширди

2022 йилда Россиянинг Украинага бостириб кириши бошланганидан сўнг, кўплаб хорижий компаниялар Ғарбнинг кенг кўламли санкциялари фонида Россия Федерациясидаги иштирокини қисқартиришга ваъда беришди. Бироқ Россия расмийлари “дўст бўлмаган мамлакатлар” активларига мажбурий 50 фоизлик чегирма ва камида 15 фоизли “чиқиш солиғи”ни жорий этиш орқали фирмаларни тарк этиш нархини босқичма-босқич оширди, деб ёзади нашр. Бундан ташқари, журналистлар таъкидлаганидек, Ғарб фирмалари учун ҳам, Россия расмийлари учун ҳам мақбул бўлган ва битимлари Ғарб санкцияларига зид бўлмаган маҳаллий харидорларни топиш тобора қийинлашиб бормоқда.

FT нашрининг яна бир суҳбатдоши Россия Федерациясида қолган хорижий компаниялар 30 йил давомида муҳим ишлаб чиқариш базасини яратганликлари ва уни арзон гаровга сотишни истамасликлари сабабли бундай қадам қай даражада зарурлиги ҳақидаги саволни ўртага ташламоқда.

Россия расмийлари аралашган битимга мисол сифатида нашр Нидерландиянинг Heineken пиво ишлаб чиқарувчи компанияси активлари билан боғлиқ вазиятни келтиради. Россия томони савдони мувофиқлаштиришдан бош тортди ва активларни “Дихлофос” репеллентлари, “Прелесть” соч лаклари ва ҳавони мусаффо қилувчи воситаларни ишлаб чиқарадиган Россиянинг Arnest Group компаниясига топширди.

Апрель ойида Hugo Boss  компаниясининг Россия активларини сотиш бўйича келишуви, шунингдек, Auchan  француз компаниясининг шўъба корхонаси учун шунга ўхшаш битим ҳақида хабар берилган эди. Март ойида ғишт ишлаб чиқариш бўйича жаҳон етакчиси бўлган Wienerberger компаниясининг Россия Федерациясидаги заводлари сотилди.