Буюк Британия энг йирик ҳарбий ёрдам пакети доирасида Украинага авиабомбалар етказиб беради

Кеча маъқулланган энг йирик ҳарбий ёрдам пакети доирасида Буюк Британия Украинага Paveway IV юқори аниқликда бошқариладиган бомбаларини етказиб беради. Бу ҳақда BBC мухбири Жонатан Бил Х ижтимоий тармоғида маълум қилди.

Paveway IV – Paveway оиласидаги авиабомбаларнинг энг сўнгги модификацияси ҳисобланади. Бу 2008 йилдан буён Британия қуролли кучларида бўлган, модификация қилинган Mk 82 авиация бомбасига асосланган 230 кг массали, юқори ёриб кириш қобилиятга эга снаряд. Навигация тизими икки режимли: GPS ёки инерцион INS. Paveway IV юқори аниқликка эга бўлиб, навигация режимидан қатъи назар, лазер ёрдамида нишонга йўналтирилади ва ташлангандан сўнг думалоқ қисмидаги руллари ёрдамида режалаштирилган пастга тушади.

Ҳозирда Paveway IV бомбалари Eurofighter Typhoon, F-35, Panavia Tornado, Harrier II қирувчиларида қўлланилади. Уларни Украина қуролли кучларида мавжуд бўлган F-16 ёки совет даврида ишлаб чиқарилган самолётлардан ҳам ташлаш мумкин.

Янги ҳарбий ёрдам пакети билан боғлиқ равишда, Буюк Британия Украинага 500 миллион фунт стерлинг (620 миллион доллар атрофида) ажратади. Бу давлат тарихидаги энг йирик ҳарбий транш ҳисобланади. Paveway IV бомбалари билан бирга, Украина 400 та транспорт воситаси, шу жумладан Husky зирҳли машиналари, 1600 та зарбали ва зенит ракеталари, жумладан Storm Shadow, 60 та катер ва 4 миллион патронни қабул қилиб олади.

Шунингдек, Буюк Британия 2030 йилгача мудофаа харажатларини ЯИМнинг 2.5 фоизигача оширади, АҚШ Сенати эса Украинага 61 миллиард доллар миқдоридаги фавқулодда ёрдам пакетини маъқуллади.