Жанубий Африкада янги парламент сайланмоқда

1994 йилда демократия жорий этилганидан бери мамлакатни доимий равишда бошқариб келаётган “Африка Миллий Конгресси” (АМК) бу сафар мутлақ кўпчиликни йўқотиши мумкин. Овоз беришдан олдинги сўровлар шуни кўрсатдики, АМК 50 фоиздан кам овозни олиши мумкин ва у коалиция тузиш учун шерик излашга мажбур бўлади. Бу ҳақда DW хабар беради.

Ҳукмрон “Африка миллий конгресси” нуфузининг пасайишига ҳукуматнинг заиф фаолияти сабаб бўлгани айтилмоқда. Мамлакат иқтисодида турғунлик кузатиляпти, ишсизлик ва қашшоқлик даражаси юқорилигича қолмоқда.

Давлат компаниялари инқирозда, электр ва сув мунтазам равишда ўчириляпти. Соғлиқни сақлаш ва адлия тизимлари самарасиз. Жиноят ва коррупция даражаси юқори.

Бироқ, АМКнинг 40 фоиздан кўпроғини қўллаб-қувватлаётгани сайловчилар ҳали ҳам ушбу партияни апартеиддан озод қилган партия сифатида кўриши билан изоҳланади.

Миллий ассамблеяга, яъни парламент қуйи палатасига сайловда 52 партия иштирок этмоқда. 40,1 миллион сайловчининг 27,4 миллиони ёки 68 фоизи овоз бериш учун рўйхатга олинган. Овоз бериш натижалари 2 июнь куни эълон қилинади. Шундан сўнг, 14 кун ичида янги парламент ҳукуматни тузиб, президентни сайлаши керак.

Бу сайловларда Жанубий Африканинг амалдаги президенти, 71 ёшли Сирил Рамафоса бошчилигидаги АМК учун энг катта рақобатни Жон Стенхейзен бошчилигидаги  “Демократик альянс” либерал партияси ташкил қилмоқда.

Учинчи энг оммабоп партия – аввалроқ АМКнинг ёшлар қанотини бошқарган Жулиус Малема бошчилигидаги”Иқтисодий эркинлик курашчилари” марксистик партияси.

Чоршанба куни Миллий Ассамблеяга сайловлардан ташқари Жанубий Африканинг тўққизта провинциясининг қонун чиқарувчи органи ҳам сайланади. Миллий ассамблея мамлакат ҳукуматини тузади ва парламентдаги кўпчиликнинг раҳбари президент бўлади.

Парламентнинг юқори палатаси провинцияларнинг қонун чиқарувчи органлари вакилларидан тузилади. Шундай экан, келгуси беш йил давомида мамлакатни ким бошқариши овоз бериш натижаларига боғлиқ.