Шойгунинг ўринбосари иши бўйича ҳибсга олинган “Олимпситистрой” ҳамсоҳиби БРБ билан боғлиқлиги маълум бўлди

Мудофаа вазири ўринбосари Тимур Иванов иши бўйича пора берганликда айбланаётган тадбиркор Александр Фомин Мудофаа вазирлигининг «Олимпситистрой» пудратчи компанияси асосчиси ҳисобланади. Афтидан, у Санкт-Петербургдаги Ҳарбий муҳандислик-техника университетини тамомлаган – “Вконтакте” ижтимоий тармоғида Фомин Владимир Путиннинг ҳарбий мактаблар битирувчилари билан учрашуви суратида қайд этилган, деб ёзади «Важные истории» нашри.

Унинг иккинчи асосчиси Дмитрий Хавронин 2000 йилларнинг бошида Мудофаа вазирлигининг Бош разведка бошқармаси (БРБ) ётоқхонасида рўйхатдан ўтган. Очиқ манбаларда унинг олдинги иш жойлари ҳақида ҳеч қандай маълумот йўқ.

Хавронин, шунингдек, «Оборонспецстрой» компанияси билан ҳамкорликда ташкил этилган «Бригантина» МЧЖ асосчиси ҳисобланади. У, ўз навбатида, 2021 йилдан 2023 йилгача ушбу ишда иштирок этган бошқа шахс Сергей Бородин томонидан яратилган «Волжский Берег» компаниясига эгалик қилган. Ивановнинг Тверь областидаги дачаси унинг номига рўйхатга олинган, деб ёзади “Проект”.

«Олимпситистрой» компанияси 2006 йилда пайдо бўлган ва ҳарбий объектлар – ҳарбий қисмлар, ҳарбий шаҳарчалар, кадет мактаблари ва Мудофаа вазирлиги билан боғлиқ бошқа объектларни қуришда мунтазам иштирок этган. 2022 йил май ойида Мариуполь рус қўшинлари томонидан босиб олингандан сўнг, у вайрон қилинган шаҳарни қуришга киришган. Хусусан, тадбиркор Фомин Иванов Мариуполдаги қурилиш майдончасини кўздан кечираётган видеода пайдо бўлади.

Ўтган йили «Олимпситистрой» компаниясининг соф фойдаси деярли 4 баравар ошган, дейди тадқиқотчи журналист Сергей Ежов. Бу деярли 11 миллиард рублни ташкил этади. Компаниянинг 2023 йилдаги даромади 65 миллиард рублдан ошган, 2022 йилда – 19 миллиард рубль.