The Economist: АҚШ Зеленскийнинг “ғалаба режаси”ни “муваффақиятсиз” деб ҳисоблади

The Economist нашрига юқори мартабали украиналик амалдор айтишича, АҚШ Украина президенти Владимир Зеленскийнинг “ғалаба режаси”ни у можарони кучайтиришни назарда тутгани учун “муваффақиятсиз” деб ҳисоблади.

Унинг сўзларига кўра, режани Россияни Украина билан Киев учун қулайроқ шартларда музокараларга мажбур қилиш усули сифатида талқин қилиш керак. Бироқ айнан шу нарса Вашингтондаги амалдорларга ёқмади. “Улар буни муваффақиятсизликка маҳкум дейишмоқда, гарчи муаммонинг бир қисми шундаки, улар бу ҳақда [украиналик] президентга юзма-юз айтишмаяпти”, – дея изоҳлади нашр суҳбатдоши.

Бундан олдин америкалик амалдорлар The Wall Street Journal нашрига, Зеленский режасида Россия устидан ғалабага эришиш имконини берадиган тўлақонли стратегия йўқлигини айтишганди. Моҳиятан у кўпроқ қурол-яроғ ва узоқ масофали ракеталарни қўллаш бўйича чекловларни бекор қилиш тўғрисидаги қайта ишланган илтимосдан бошқа нарса эмас, дея тушунтиришганди WSJ суҳбатдошлари.