Толиблар қамоқхонада ҳуқуқ ҳимоячиси бўлган афғон аёлини зўрлашди

Толиблар қамоқхонада ҳуқуқ ҳимоячиси бўлган афғон аёлини зўрлаб, уни видеога ёзиб олган, кейин эса бу ёзув билан уни шантаж қилишган. Бу ҳақда The Guardian ёзади. Видеоёзув таҳририятда бор. Жабрланган аёлнинг исми ошкор этилмаган.

Эҳтиёт бўлинг, қуйида матнда зўравонлик тавсифи мавжуд.

Журналистларнинг сўзларига кўра, инсон ҳуқуқларини қўллаб-қувватлаган афғонистонлик фаол қамоқхонада зўрланган, дейди журналистлар. У Толибон режимига қарши митингда қатнашгани учун қамалган. Видеода уни ечинишга мажбур қилишган, шундан сўнг икки эркак уни зўрлаган. Бу пайтда толиблардан бири унга: «Шунча йил сени америкаликлар …, энди навбат бизники» деган.

Ҳуқуқ ҳимоячиси бўлган аёл қамоқхонани тарк этгач, мамлакатдан чиқиб кетишга  муваффақ бўлган. The Guardian нашрининг ёзишича, у хориждан толибларга қарши курашни давом эттирган, шундан сўнг унга зўрланиш акс этган видео юборилган. Шунингдек, аёлнинг сўзларига кўра, толиблар ҳуқуқ ҳимоячиси Афғонистонда уларнинг ҳокимиятига қарши чиқишда давом этса, бу видеони чоп этиш билан таҳдид қилишган.

The Guardian  нашрининг қайд этишича, бу видео толибларнинг афғон аёлларига нисбатан жинсий зўравонлик қилганининг биринчи далилидир. Шу билан бирга, журналистларга кўра, мамлакатда зўрлаш ҳақидаги хабарлар сўнгги пайтларда кўпаймоқда. Бундан ташқари, июнь ойида БМТнинг Афғонистондаги вазият бўйича махсус маърузачиси Саймон Мэнли айниқса маҳкума аёллар жинсий зўравонликка дучор бўлиш эҳтимоли катталигини айтади.

Толиблар Афғонистонда ҳокимиятни 2021 йил августида тўлиқ қўлга киритган. Ўшандан бери улар ҳуқуқ ҳимоячилари таъкидлаганидек, аёлларга қарши «гендер апартеид» сиёсатини олиб бормоқда. Хусусан, афғон аёлларига ўрта мактабга бориш, пул эвазига ишлаш, кўплаб жамоат жойларига бориш ва эркин кийим танлаш тақиқланган.