Украина Қримдан дон олиб чиқаётган юк кемасини ушлади

Украина ҳукумати Одесса областининг Рени порти акваториясида махсус хизматлар маълумотларига кўра, Россия Украинанинг аннексия қилинган ҳудудларидан ўғирлаган донни Камерун байроғи остида олиб кетаётган кемани ҳибсга олди. Бу ҳақда 11 июль куни Украина Бош прокуратураси ва Украина хавфсизлик хизмати (УХХ) хабар берди.

Украина Бош прокурорининг маълумотларига кўра, 2023 йил ноябрь ойида Камерун байроғи остида сузаётган USKO MFU кемаси Украина қонунчилиги ва халқаро денгиз қонунчилигини бузган ҳолда, Севастополдаги ёпиқ портга кириб, чиқиб кетган. Портда кема турк компанияси учун мўлжалланган уч минг тоннадан ортиқ қишлоқ хўжалиги маҳсулотларини юклаган.

Озарбайжон фуқароси бўлган кема капитани GPS-трекерни ўчириб, йўналишлар ва тўхташлар журналига ёлғон маълумотларни киритиш орқали кема қаерда эканлигини бир неча бор яширган, дея хабар беради УХХ. 2024 йил май ойининг охирида кема яна Севастопол портига кирган ва GPS-трекерни ўчирган ва у ерда Туркиядан олиб келинган юкни туширган.

2 июль куни портни тарк этиб, кема Молдова портларидан бирига йўл олган. Кема Рени порти сувлари орқали ўтаётганида суд қарори билан ҳибсга олинди, дея хабар беради Бош прокуратура.

Кема капитани Украинанинг вақтинча босиб олинган ҳудудига кириш ва чиқиш тартибини бузгани учун 5 йилгача озодликдан маҳрум этилиши мумкин (Украина Жиноят кодексининг 332-1-моддаси 2-қисми).

Кема экипажи 12 нафар хорижий фуқародан иборат. 2014 йил 15 июлда Украина Россия томонидан аннексия қилинган Қрим ва Севастополь ҳудудидаги барча портлар фаолиятини расман тўхтатганди.