WSJ: АҚШ Украинага ATACMS ракеталари билан Россиядаги нишонларга зарба беришни ҳамон тақиқламоқда

АҚШнинг Россияга Америка қуроллари билан зарба бериш учун чекланган рухсати ҳали узоқ масофага учувчи  ATACMS ракеталаридан фойдаланишга тааллуқли эмас. Бу ҳақда The Wall Street Journal нашри манбаларга таяниб хабар берди, деб ёзади “Европейская правда” нашри.

АҚШнинг янги сиёсати Украина кучларига артиллериядан фойдаланиш ва HIMARS қурилмаларидан қисқа масофали ракеталар билан Россия ҳудудидаги қўмондонлик пунктлари, қурол-яроғ омборлари ва Харьков областига ҳужум қилиш учун рус кучлари томонидан фойдаланиладиган бошқа объектларга қарши зарба бериш имконини беради.

Аммо Вашингтон ўз позициясини ўзгартирганига қарамай, Украинага Россия ҳудудида узоқ масофали ATACMS ракеталаридан фойдаланишга рухсат бермаяпти.

АҚШ қуролларидан фойдаланишнинг тор географик диапазони Байден маъмуриятининг Украинага Россиянинг Харьков областига ҳужумидан яхшироқ ҳимояланишда ёрдам беришга уриниши, шу билан бирга можаронинг Вашингтон ва Москва ўртасидаги тўғридан-тўғри тўқнашувга айланиб кетиши хавфини чеклайди, дея тушунтиради нашр.

“Президент яқинда ўз жамоасига Украина унга ҳужум қилаётган ёки ҳужумга тайёрланаётган Россия кучларини қайтариш учун Харьков областида жавоб зарбасини бериш учун Украина Қўшма Штатлар томонидан тақдим этилган қуроллардан фойдаланиши мумкинлигини таъминлашга кўрсатма берди”, – дея иқтибос келтиради нашр америкалик амалдордан.

“Россияда ATACMS ёки узоқ масофали зарбалардан фойдаланишни тақиқлаш бўйича сиёсатимиз ўзгармади”, – дея қўшимча қилади расмий.

АҚШ украиналикларга Харьков областида фойдаланишга рухсат берадиган қуролларга GMLRS бошқариладиган ўқ-дорилар, HIMARS тизимлари ва артиллерия тизимлари киради, дейди АҚШ расмийлари.

2022 йил февраль ойидан бери Қўшма Штатлар Украинага етказиб бераётган ҳар қандай қурол-яроғнинг Россия ҳудудига ҳужум қилиш учун ишлатилишига рухсат бермаяпти. Украинага Қримдаги нишонларга зарба беришга рухсат берилди, чунки у Украинанинг халқаро тан олган чегаралари ичида жойлашган ва Вашингтон Москванинг ярим оролни аннексия қилишини ноқонуний деб ҳисоблайди.