Shavkat Mirziyoyev Vladimir Putinni Rossiya prezidenti saylovidagi g‘alabasi bilan qutladi

O‘zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putinni bo‘lib o‘tgan Prezident saylovida qozongan ishonchli g‘alabasi bilan tabrikladi. Bu haqda Prezident matbuot kotibi Sherzod Asadov ma’lum qildi.

Davlat rahbari maktubida saylovchilarning yuqori faolligi va ovoz berish natijalari aholi Vladimir Putinning siyosati va ijtimoiy-iqtisodiy islohotlar dasturiga ishonch bildirayotgani va ularni qat’iy qo‘llab-quvvatlayotganining navbatdagi yorqin namoyishi bo‘lgani ta’kidlanadi.

Mirziyoyev Rossiya Prezidentiga mustahkam sog‘lik, baxt-saodat va davlatchilik faoliyatida katta muvaffaqiyatlar, Rossiya xalqiga esa tinchlik va ravnaq tiladi.

Avvalroq Tojikiston prezidenti Emomali Rahmon Vladimir Putinni Rossiya prezidenti saylovidagi “ishonchli g‘alabasi” bilan tabriklagan edi.

Vladimir Putinni g‘alaba bilan qutlagan ilk chet el yetakchilari orasida Venesuela prezidenti Nikolas Maduro va Nikaragua rahbari Daniel Ortega ham bo‘ldi.

Rossiya Markaziy saylov komissiyasi protokollarning 99,33 foizi hisoblab chiqilganidan keyin bergan ma’lumotlarga ko‘ra, Putin prezident saylovida ovozlarning 87,32 foizini to‘plamoqda. Boshqa nomzodlar, jumladan, Nikolay Xaritonov 4,32 foiz, Vladislav Davankov 3,79 foiz va Leonid Slutskiy 3,19 foiz ovoz yig‘gan. Ovoz berishda saylovchilarning 74,22 foizi qatnashgan.