Putin auditorni Rossiya mudofaa vaziri o‘rinbosari etib tayinladi

Vladimir Putin Rossiya mudofaa vaziri o‘rinbosari, vazirlik apparati rahbari lavozimiga Oleg Savelyevni tayinladi, deb yozadi Meduza.

Shu paytgacha Savelyev Hisob palatasi auditori bo‘lib ishlagan. 2014—2015-yillarda u Rossiyaning Qrim ishlari bo‘yicha vaziri lavozimini egallagan. Shundan keyin bu lavozim bekor qilingan. Savelyev 2014-yildan AQSH sanksiyalari ostida bo‘lib, keyinroq Yevroittifoq, Ukraina, Avstraliya, Kanada sanksiyalar ro‘yxatiga kiritilgan.

Undan avval 2008-yildan boshlab esa Rossiya iqtisodiy rivojlanish vaziri o‘rinbosari bo‘lgan.

Savelyev Rossiyaning yangi mudofaa vaziri Andrey Belousovning birinchi o‘rinbosariga aylandi.

Rossiya Mudofaa vazirligi apparati rahbari lavozimini egallab kelgan general-polkovnik Yuriy Sadovenko iste’foga chiqarildi. U Sergey Shoyguning eng yaqin maslakdoshi hisoblanib, uning rahbarligi ostida 2002-yildan Rossiya Favqulodda vaziyatlar vazirligi va Mudofaa vazirligida ishlagan.