Сенат раиси: Маданият вазирлиги бюджетидан 12 млрд сўм талон-тарож қилинган

Маданият вазирлигида амалда етказиб берилмаган маҳсулотлар, бажарилмаган ишлар ва кўрсатилмаган хизматлар учун 12 млрд. сўм бюджет маблағи талон-тарож қилинган. Бу ҳақда Сенат раиси Танзила Нарбаева маълум қилди.

«Биз, “моддий-маданий мерос объектларига қаранглар, маданият марказлари хароб аҳволда”, десак пул йўқ дейишади. Амалда эса аҳвол мана бундай!», – дейди юқори палата раҳбари.

Танзила Нарбаева тизимда назорат суст эканини қайд этди.

«Албатта, жавобгарлик муқаррар, ундан қочиб кетиб бўлмайди. Муаммо, бунга шароит яратиб бераётган омиллар: очиқлик таъминланмаган, масъулият йўқ, назорат суст! Тизим раҳбарлари бу хусусида бош қотиришлари шарт. Акс ҳолда, бу каби ҳолатлар ҳали-бери тугамайди».

Аввалроқ биз маданият вазирлигининг бош бухгалтери упани ҳақиқий қийматидан 57 баравар қимматга харид қилгани ва шу тарзда бюджетдан 2,3 млрд сўм талон-тарож қилингани ҳақида ёзгандик.