Грин-карта натижалари эълон қилинди

Грин-картанинг натижалари эълон қилинди, бу натижаларни dvprogram.state.gov сайтидан топиш мумкин. Ҳар йили “Грин-карта” (Diversity Visa Lottery) лотереяси доирасида АҚШга кўчиб келишнинг тарихан паст даражасига эга бўлган мамлакатлар фуқароларига 50 минг виза берилади.

Натижаларни текшириш учун ўз иштирокчи рақамингизни (Confirmation Number) киритишингиз керак. У рўйхатдан ўтаётганингизда берилади, рақамни исм-шарифингиз, туғилган санангиз ва электрон почтангиз каби асосий маълумотларингизга кўра осонгина тиклаш мумкин.

Натижалар электрон почтангизга келмайди, уларни Давлат департаментининг сайтидан мустақил равишда текширишингиз керак. Агар электрон почтангизга хабарнома келган бўлса, демак, бу фирибгарларнинг иши бўлиб, тез орада улар сиздан пул сўрашади.

Ўтган йили АҚШнинг Ўзбекистондаги элчихонаси Green Card дастури бўйича берилган иммиграция визалари сони бўйича дунёда еттинчи ўринни эгаллаганди.