Исроил Ғазо аҳолисини сиқиб чиқаришни режалаштирмаяпти

Исроил бош вазири Биньямин Нетаньяху Фаластиннинг Хамас ҳаракати билан жанговар тўқнашувлар тугаганидан кейин Исроил қуролли кучлари Ғазо секторини доимий асосда эгаллаб турмаслигини маълум қилди. У шунингдек Исроил ҳокимияти Фаластин аҳолисини анклавдан ҳайдашни режалаштирмаётганига ишора қилди.

“Бир нечта жиҳатларни аниқлаштириб қўяй: Исроил Ғазони доимий эгаллаш ёки у ердаги аҳолини ҳайдашни режалаштирмаяпти. Исроил Хамас террорчиларига қарши курашмоқда, Фаластин аҳолисига қарши эмас, ва биз буни халқаро ҳуқуққа тўлиқ мувофиқ равишда амалга оширмоқдамиз”, – дейди Нетаньяху. Сиёсатчи фаластинликларни Ғазо секторидан бутунлай чиқариб юбориш керак деган Исроил амалдор ва қонунчиларнинг фикрларини қўллаб-қувватламаслигини айтади.

У шунингдек Исроил мудофаа кучлари ҳар куни аҳоли орасидаги йўқотишларни минималлаштириш учун барча имкониятни ишга солаётганини, Хамас эса уларни максималлаштириш учун барча имкониятни ишга солаётганини, тинч фаластинликлардан қалқон сифатида фойдаланаётганини таъкидлади.