“Экологик транспорт” дастури доирасида давлат эски автомобилларни янгиларига алмаштиришда субсидия таклиф қилмоқда

2024 йил 1 июндан бошлаб янги экологик сиёсат доирасида республикада автомобилларни рўйхатга олиш ёки қайта рўйхатдан ўтказиш жараёнида экологик стандартларга мувофиқлиги мажбурий синовдан ўтказилади. Натижаларга кўра, эгаларига қўшимча тўловларсиз махсус экологик стикерлар берилади.

Бу жараён Давлат Йўл ҳаракати хавфсизлиги хизмати бўлинмалари орқали амалга оширилади. Муҳим шарт – барча автомашиналарнинг белгиланган муддатларда экологик меъёрларга мувофиқлигини мажбурий кўрикдан ўтказиш: 2027 йилнинг 1 январига қадар Тошкент шаҳрида, 2029 йилнинг 1 январига қадар Нукус, вилоят марказлари ва танланган экологик зоналарда ҳамда 2031 йилнинг 1 январига қадар бошқа ҳудудларда.

Мулк эгаларига қулайлик яратиш мақсадида белгиланган бўлимларда экологик стикер ёпиштирилган автомобилларни қўшимча тўловсиз ҳар йили ихтиёрий қайта кўрикдан ўтказиш мумкин. Ушбу чора автомобилнинг экологик хавфсизлиги ҳолатини ўз вақтида янгилаш имконини беради.

Электромобиллар, электромототцикллар ва уч йил аввал чиқарилган янги транспорт воситаларига алоҳида эътибор қаратилмоқда. Уларнинг эгалари яшил стикерларни онлайн иловалар орқали диагностик текширувсиз ёки тўловсиз олишлари мумкин ва стикерлар почта орқали юборилади.

Барча экологик зоналар тез ёрдам автомобиллари, тезкор хизматлар ва жамоат транспорти учун чекловларсиз очиқ. Шу билан бирга, зонанинг экологик тоифасига мос келмайдиган транспорт воситалари учун экологик компенсация тўловлари шарти билан вақтинча фойдаланиш имконияти тақдим этилади.

Бундан ташқари, давлат эски автомобилларни янгиларига алмаштириш учун субсидиялар таклиф қилмоқда ва бу билан автопаркни янада экологик тоза моделлар билан янгилашни қўллаб-қувватлаяпти.