ОТБ: Ўзбекистон иқтисодиёти 2024 йилда 5,5% га ошади ва 2025 йилда бироз тикланади

Осиё тараққиёт банкининг (ОТБ) янги флагман ҳисоботида айтилишича, Ўзбекистонда иқтисодий ўсиш 2024 йилда нархлар ошишининг уй хўжаликларининг ихтиёрий даромадига таъсири туфайли пасайиши кутилмоқда. Бу ҳақда банк матбуот хизмати Anhor.uz нашрига маълум қилган.

ОТБ ўзининг “2024 йил учун Осиёнинг ривожланиш обзори” (Asian Development Outlook – ADO)да Ўзбекистон ялпи ички маҳсулоти (ЯИМ) 2024 йилда 5,5 фоизга, 2025 йилда эса 5,6 фоизгача ўсишини прогноз қилмоқда. Тартибга солинадиган нархларнинг уй хўжаликлари даромадларига таъсири ошиши туфайли ўсиш секинлашиши кутилмоқда, бу эса истеъмол талабининг пасайишига олиб келиши мумкин.

“Ўтган йили саноат ва қишлоқ хўжалиги соҳаларидаги барқарор кўрсаткичлар туфайли Ўзбекистонда таҳсинга сазовор иқтисодий ўсиш кузатилди, – дейди ОТБнинг Ўзбекистондаги ваколатхонаси директори Канокпан Лао-Арайя. «Ушбу кучли ўсишни кучли инвестиция муҳити ва асосий озиқ-овқат маҳсулотларини солиқдан озод қилиш бўйича стратегик сиёсат қўллаб-қувватлади, бу қатъий пул-кредит сиёсати билан биргаликда инфляциянинг сезиларли секинлашишига ёрдам берди».

2024 йилда ўсиш суръатларининг прогноз қилинаётган секинлашишига қарамай, иқтисодий истиқбол эҳтиёткорлик билан оптимистик бўлиб қолмоқда. Хизмат кўрсатиш ва қишлоқ хўжалиги соҳаларида ўсиш суръати секинлашиши кутилмоқда, шу билан бирга хусусий истеъмол ва инвестициялар ҳам бироз суръатни йўқотиши мумкин. Энергетика соҳасида амалга оширилаётган тизимли ислоҳотларнинг мувозанатлаштирувчи таъсири ва пул-кредит сиёсатининг қаттиқлашуви ҳисобига инфляция суръатларининг барқарор сақланиб қолиши прогноз қилинмоқда.

Бироқ бюджет-солиқ сиёсати қийинчиликларга дуч келмоқда, чунки таркибий ислоҳотлар ва ижтимоий харажатларнинг кўпайиши бюджет консолидацияси ва тақчилликни камайтиришга қаратилган саъй-ҳаракатларни чеклаши мумкин. Бинобарин, импорт ва тушумларнинг камайиши ҳисобига жорий ҳисоб тақчиллигининг мос равишда ошиши билан бюджет тақчиллиги кенгайиши кутилмоқда.

ОТБнинг фикрича, “яшил” ривожланиш сиёсати Ўзбекистоннинг “яшил” иқтисодиётга ўтишида муҳим аҳамиятга эга. Турли вазирликлар ва идоралар ўртасида “яшил” сиёсатнинг ҳозирги парчаланиши “яшил” иқтисодиётга самарали эришиш учун хавф туғдиради. Саъй-ҳаракатларни тартибга солиш, мувофиқлаштиришни яхшилаш ва мамлакатнинг барқарор иқтисодий амалиётга ўтиш жараёнини тезлаштириш учун мўлжалланган иқлим сиёсати бўйича кенгашни ташкил этиш таклиф этилмоқда.