Ҳуқуқни муҳофаза қилувчи органлари ходимларига 4 млн ёшлар бириктирилган

Ёшлар ишлари агентлиги томонидан 9 452 та маҳаллада 8,3 млн нафар “ёшлар баланси”ни шакллантириш орқали касб-ҳунар ва чет тилларига ўқитилди, деб хабар бермоқда Ёшлар ишлари агентлиги раҳбарияти.

Давлат идораларининг 7 963 нафар раҳбарига алоҳида ишлаш талаб этиладиган 123 281 нафар ёшлар номма-ном бириктирилиб, раҳбарлар томонидан ёшлар билан учрашувлар ўтказилган ва уларнинг 81 163 нафарига турли ижтимоий-иқтисодий кўмак кўрсатилган.

«Ҳуқуқни муҳофаза қилувчи органларнинг 18 105 нафар ходимига 4 млн ёшлар оталиққа берилиб, улар билан ишлаш учун 1 372 нафар масъулдан иборат мувофиқлаштирувчи штаблар ташкил этилди ва доимий мониторинг қилиш бўйича “yoshlar.ijro.uz” ягона электрон платформаси ишга туширилди», – дейилади хабарда.

156 минг нафар ёшларга деҳқончилик қилиши учун “маҳалла еттилиги” тавсияси билан 60 минг гектар унумдор ер майдонларини ажратиш ишлари бошланган.

Оилавий тадбиркорликни ривожлантириш дастурлари доирасида 9 минг нафар ёшга имтиёзли кредит ажратилиб, 22 минг нафар ёшлар касб-ҳунарга ўқитилган.

Ёшларни хорижий тил ва замонавий касбларга ўқитиш орқали юқори даромадли фаолиятга жалб этиш мақсадида “Келажак касблари” лойиҳасида 18,6 минг ёшларнинг ўқув марказлардаги курс харажатлари тўлаб берилган.