Ўзбекистон президенти сейсмик хавфсизлик тўғрисидаги қонунни имзолади

Президент Шавкат Мирзиёев “Ўзбекистон Республикаси аҳолиси ва ҳудудининг сейсмик хавфсизлигини таъминлаш тўғрисида”ги қонунни имзолади. У олти ойдан кейин кучга киради. Ҳозирча эса сейсмик хавфсизлик соҳасидаги муносабатлар қарийб 20 та тарқоқ қонуности ҳужжатлари билан тартибга солинмоқда, деб ёзади “Спутник” нашри.

Янги ҳужжат ушбу ҳуқуқий нормаларнинг ҳаммасини бирлаштирган бўлиб, давлат органларининг, хусусан, ҳукуматнинг, ФВВнинг, Қурилиш вазирлигининг, Фанлар Академияси ва жойлардаги давлат ҳокимияти органларининг сейсмик хавфсизликни таъминлаш бўйича асосий вазифаларини белгилаган.

Бундан ташқари, қонун билан сейсмик хавфсизлиги таъминланадиган объектларининг  таснифи ҳамда бинолар ва иншоотларнинг сейсмик чидамлилигини текшириш ва мониторинг қилиш тартиби ўрнатилди.

Қонунга кўра, сейсмик хавфсизлиги таъминланадиган объектлар аҳамиятига кўра қуйидаги тоифаларга бўлинади:

I тоифа – хавфлилик омили паст бўлган объектлар;

II тоифа – хавфлилик омили ўртача бўлган объектлар;

III тоифа – хавфлилик омили юқори бўлган объектлар;

IV тоифа – хавфлилик омили жуда юқори бўлган объектлар.

Ўзбекистон ҳудудида сейсмик хавфни баҳолаш Фанлар академияси томонидан тегишли давлат органлари ва ташкилотлари билан биргаликда амалга оширилади.

Сейсмик фаол зоналарда жойлашган, қурилиш нормалари ва қоидаларига мувофиқ лойиҳалаштирилган ҳамда қурилган II–IV тоифадаги объектлар ҳар 5 йилда зилзилабардошликка доир визуал текширувдан ўтказилади..

Сейсмик фаол зоналарда жойлашган III–IV тоифадаги объектлар ҳар 10 йилда зилзилабардошликка доир инструментал-техник текширувдан ўтказилиши лозим.

Сейсмик фаол зоналарда янги қурилган III–IV тоифадаги объектлар ишга туширилаётганда зилзилабардошликка доир инструментал-техник текширувдан мажбурий тартибда ўтказилади.

IV тоифадаги объектларга тааллуқли сув омборлари тўғонларида ва гидроэлектростанцияларда инструментал-техник текширувлар бир йилда икки марта ўтказилади.

Сув омборлари тўғонларининг инструментал-техник текширувлари сейсмик фаол ҳудудларда содир бўлган ҳар бир кучли зилзиладан кейин мажбурий тартибда ўтказилади.

Қонунга кўра, кучли зилзилалар натижасида етказилган зарарни баҳолашга доир ишлар Вазирлар Маҳкамаси томонидан амалга оширилади.