Спортчилар Жахон кубогида 4-ўринни эгаллади

31-мартдан 11-апрелга қадар Таиланднинг Пхукет шаҳрида оғир атлетика бўйича Жаҳон кубоги бўлиб ўтди. Дунёнинг 110 давлатидан 466 спортчи қатнашган мусобақада Ўзбекистон терма жамоаси 3 та олтин ва 1 та бронза медалларига сазовор бўлди.

“Ушбу натижа билан эркаклар терма жамоаси медаллар жамғариш бўйича КХДР, Хитой ва Арманистондан сўнг тўртинчи ўринни эгаллади”, – дейилади хабарда.

Барча медаллар эркаклар ўртасида -109 кг вазн тоифасидаги баҳсларда қўлга киритилган. Токио-2020 Олимпия ўйинлари чемпиони Акбар Жўраев ушбу вазнда тенгсиз бўлиб, барча йўналишларда олтин медалларни қўлга киритган бўлса, терма жамоа аъзоси Шарофиддин Амриддинов даст кўтариш машқида бронза медали билан тақдирланган.