Ғарб разведкаси Путиннинг Европада портлашлар ва диверсиялар уюштириш режалари ҳақида огоҳлантирди

Европа Иттифоқи мамлакатлари разведка хизматлари ўз ҳукуматларини Россия Европада қўпорувчилик ҳаракатларини тайёрлаётгани ҳақида огоҳлантирди, дейди Financial Times нашрига Ғарб разведкаси вакиллари.

Уларнинг маълумотларига кўра, Москва ўз агентлари ва ишончли вакиллари ёрдамида портлашлар, ўт қўйиш ва Европа инфратузилмасига зарар етказишни тайёрламоқда. Шу билан бирга, улар тинч аҳоли орасидан эҳтимолий қурбонлар ҳақида деярли ташвишланмаяпти. ЕИнинг уч мамлакати вакиллари Россия разведка хизматлари Европада аввал ҳам худди шундай операцияларни амалга оширгани, бироқ эндиликда янада мувофиқлаштирилган ва тажовузкор тарзда ҳаракат қилишга тайёрлигини билдирди.

“Биз Россия томонидан назорат қилинадиган қўпорувчилик хавфи сезиларли даражада ошди, деб ҳисоблаймиз”, – дейди Германия Федерал Конституциясини ҳимоя қилиш идораси раҳбари Томас Хальденванг. Унинг сўзларига кўра, Россия “зарар етказиш эҳтимоли юқори бўлган Европа ҳудудларида операциялар ўтказишда ўзини қулай ҳис қилмоқда”. Хальденвангнинг баёноти Германияда немис ҳарбий ва логистика объектларига ҳужумлар уюштиришни режалаштирган икки рус агенти ҳибсга олинган пайтга тўғри келди.