Ереван кўчаларига ўн минглаб одамлар чиқди: улар Арманистон-Озарбайжон чегараси делимитация қилинишига қарши норозилик билдирмоқда

Ереван марказидаги кўчаларда ҳукумат бинолари атрофида ўн минглаб одамлар йиғилди. Булар “Ватан учун Тавуш” ҳаракати тарафдорлари бўлиб, улар Арманистон-Озарбайжон чегарасининг делимитация қилиниши жараёнига қарши норозилик билдиришмоқда, ушбу жараён  доирасида тўрт қишлоқ Озарбайжонга ўтказилган. Намойишга архиепископ Баграт Галстанян бошчилик қилмоқда, у “маънавий Арманистон янги Арманистонни мағлуб этишини” таъкидлади.

Никол Пашинян икки кун олдин матбуот анжумани ўтказган ва унда “баъзи ички ва ташқи кучлар қуйидагилар мақсадида делимитация жараёнини тўхтатишга ҳаракат қилмоқда:

• уруш келтириб чиқариш;
• Арманистоннинг янги ҳудудларини оккупацияга дучор қилиш;
• мамлакатда ҳокимиятни сайловларсиз алмаштиришга эришиш;
• мамлакатда ноқонуний қўғирчоқ ҳукумат ўрнатиш;
• бу билан мамлакат давлатчилигини де-юре йўқ қилишдан олдин де-факто йўқ қилиш” деган эди.