Италия урушни тугатиш учун Путин билан музокараларга чақирмоқда

Италия мудофаа вазири душанба куни Россияга қарши иқтисодий санкциялар самарасиз бўлаётганини айтиб, Ғарбни Украинадаги урушни тугатиш бўйича президент Владимир Путин билан муаммони дипломатик ҳал этиш учун кўпроқ ҳаракат қилишга чақирди, дея хабар беради Reuters.

Гидо Крозетто Il Messaggero газетасига берган интервьюсида таъкидлаганидек, Ғарб ўз санкциялари “Россия агрессиясини” тўхтата олади, деб янглишган ҳолда, унинг дунёдаги иқтисодий таъсирини ортиқча баҳолаган.

“Бунинг ўрнига … бу инқирозни ҳал қилишнинг ягона йўли ҳаммани аввал сулҳ, кейин эса тинчлик билан жалб қилишдир”, – деди Крозетто.

Суҳбатдошнинг Путин музокаралар олиб боришга тайёр эмаслиги ҳақидаги эътирозига жавобан Крозетто шундай деди: “Бу кўпроқ ҳаракат қилишимиз учун яхши сабабдир. Биз у қанчалик тор бўлмасин, дипломатиянинг мумкин бўлган ҳар қандай йўлидан воз кечмаслигимиз керак”.

Италия вазири, шунингдек, Украинанинг ўтган ёзда Россияга нисбатан ўтказган қарши ҳужуми Россиянинг ҳарбий устунлигини ҳисобга олган ҳолда хато бўлганини таъкидлади.

Крозеттонинг сўзларига кўра, у шахсан Зеленскийни бу ҳаракат муваффақиятсизликка учраши ҳақида огоҳлантирган. “Аммо улар менга қулоқ солмади”, – дея шикоят қилади сиёсатчи.