РФнинг Черниговга берган зарбаси натижасида 13 киши ҳалок бўлди, 60 нафардан ортиқ киши яраланди – ИИВ раҳбари

Украина ички ишлар вазири Игорь Клименко чоршанба куни эрталаб Россиянинг Черниговга ракета ҳужуми натижасида 13 нафар тинч аҳоли ҳалок бўлгани, 60 дан ортиғи, жумладан, икки бола яралангани ҳақида хабар берди.

“Жабрланганларга зарур ёрдам кўрсатилмоқда. Полиция бузилган уйларга бирма-бир кириб, ярадорларга ёрдам беряпти. Психологлар ишлашда давом этмоқда.

Ички ишлар вазирлигининг Чернигов областидаги органлари ва бўлинмалари ходимлари жароҳатланганларнинг эҳтиёжлари учун қон топширишни ташкил қилишди”, — деб ёзади Клименко Телеграмда.

Чоршанба куни эрталаб Украина ҳукумати Россиянинг ракета зарбалари хавфи туфайли бир қатор ҳудудларда ҳаво огоҳлантиришини эълон қилди. Черниговда портлашлар эшитилди.