Тошкент аэропортида яна учта такси оператори фаолият кўрсатишни бошлайди

Uzbekistan Airports бошқарув компанияси E-auksion.uz платформасида Тошкент аэропортида такси операторларига учун жой ижараси учун учта лот жойлаштирди. Аввал хабар қилинганидек, Тошкент халқаро аэропортининг умумий учиш залида яна бир такси хизмати пайдо бўлади. Шунингдек, такси операторлари CIP учиб келиш зали  ва маҳаллий авиақатновлар терминалининг келиш зали учун алоҳида танланади.

Барча лотлар учун батафсил техник шартлар белгиланган бўлиб, компаниялар уларга риоя қилишлари мажбурий. Хусусан, даъвогар компанияда ишлаб чиқарилгани уч йилдан ортиқ бўлмаган, бензинда ишлайдиган ёки электромобилларга эга ўз автомашиналари парки бўлиши керак. Компания расмий равишда ўзбек, рус ва инглиз тилларида бошланғич билимга эга малакали ҳайдовчиларни ишга олиши керак. Автомобиллар брендланган, ҳайдовчилар эса компаниянинг махсус иш кийимида бўлиши лозим. Компания йўловчиларга барча тўлов шакллари — нақд пул ва маҳаллий ҳамда хорижий тўлов тизимларининг банк карталари билан тўлаш имкониятини таъминлаши керак бўлади.

Ҳар учала лот бўйича савдолар 17 август куни E-auksion.uz сайтида бўлиб ўтади. Кимошди савдосида техник топшириқда кўрсатилган талабларга жавоб берадиган барча манфаатдор компаниялар иштирок этиши мумкин.

Аввалроқ Рақобатни ривожлантириш ва истеъмолчилар ҳуқуқларини ҳимоя қилиш қўмитаси 2022 йил сентябрь ойида ягона такси хизмати ишга туширилганидан сўнг аэропортда тўхташ учун тўловлар оширилгани ва бошқа ташувчиларнинг киришига “сунъий тўсиқлар қўйилгани” юзасидан истеъмолчилардан шикоятлар келиб тушганини маълум қилганди. Такси оператори Uzbekistan Airports  компанияси томонидан кимошди савдоси натижасида танланган. Uzbekistan Airports компанияси қўмитанинг буйруғини бекор қилишга эришиш ниятида эканликлигини билдирганди.