Ўзбекистон ёшлар терма жамоасининг ярим ҳимоячиси допинг-тест сабабли четлаштирилди

Ўзбекистон 20 ёшгача бўлган ёшлар терма жамоаси ярим ҳимоячиси Шахриёр Жабборов допинг тест натижалари туфайли футболдан вақтинча четлаштирилди. Бу ҳақда Осиё футбол конфедерацияси (ОФК) Тартиб-интизом қўмитасининг 15 апрелдаги қарорида хабар қилинган, деб ёзади “Газета” нашри.

Маълум бўлишича, футболчининг 11 март куни Тошкентда Австралияга қарши чорак финал учрашуви куни топширган допинг-тести «тақиқланган модда аниқлангани» туфайли ижобий натижа берган.

Якуний қарор чиққунга қадар ОФК Тартиб-интизом қўмитаси Жабборовни футбол билан боғлиқ барча тадбирлар, жумладан, ички, халқаро ўртоқлик ва расмий ўйинлардаги иштирокини вақтинчалик тўхтатишга қарор қилди.

20 ёшли Шахриёр Жабборов Тошкентнинг «Пахтакор» клубида тўп суради. У Ўзбекистон ёшлар терма жамоаси таркибида финалда Ироқни мағлуб этиб (1:0) U-20 Осиё кубоги чемпионига айланганди.