Ўзбекистон тумани прокуратураси 20 ёшли қизнинг ўз жонига қасд қилиши бўйича ишни тергов қилмоқда

2023 йил 20 август куни Ўзбекистон туманида яшовчи 20 ёшли қиз ўз хонадонида ўз жонига қасд қилган. Мазкур ҳолат юзасидан туман прокуратураси томонидан тергов ҳаракатлари олиб борилмоқда, дейилади Бош прокуратура хабарида.

Ўлим сабабларини аниқлаш учун суд-тиббий экспертизаси тайинланган. Текширув натижаларига кўра қонуний қарор қабул қилинади.

Маъруфа Солиеванинг телеграм канали маълум қилишича, 20 август куни марҳум қизнинг қариндоши унга мурожаат қилган. У эрининг қариндошлари даъво қилганидек, қиз ўз жонига қасд қилганига ишонмайди.

Яқин қариндошларининг сўзларига кўра, қизнинг жасадида калтакланиш излари бор, экспертиза натижалари бир ҳафтадан кейин чиқади, ҳозирда уларга дафн маросимига рухсат берилган.

“Бундан ташқари, марҳуманинг қариндошлари унинг эрининг қариндошлари катта алоқаларга эгалигини ва ишни ёпишга ҳаракат қилиши мумкинлигини даъво қилмоқда”, – деб ёзади зўравонликка қарши “Не молчи” лойиҳаси.

Тоштемирова Зулайҳо (2003 йилда туғилган) 1993 йилда туғилган Яйпан шаҳрида истиқомат қилувчи фуқарога турмушга берилган. Ёш келин тўйдан кейин қариндошларидан уни олиб кетишларини сўраган, эри уни калтаклашини айтган.

Қизнинг ўлими ҳақида телефон орқали эшитган акаси ва синглиси дарҳол эрининг уйига бориб, опасини ҳовли ўртасида ўлиб ётганини кўришган. Уларга барча оила аъзолари уй ичида бўлганлигини айтишган. Қўшниларнинг сўзларига кўра, ўша куни Зулайҳо ҳовлида ёлғиз қолган, оила аъзолари уни қамаб, уйдан чиқиб кетган.

“Тахминларга кўра, у уйига бормаслик учун калтакланган ва қамаб қўйилган. Ўлимидан олдин у қўшниларини чақирган. Видеода қизнинг қариндошлари уни қутқара олмагани учун ундан кечирим сўрашмоқда. Бу фарзандини йўқотган ота-она учун ачинарли ҳолат, уларнинг йиғлашини тинглаш оғриқли, лекин ўз жонига қасд қилиш  ягона йўл деган қарорга келган қизнинг бошидан кечирган азоб-уқубатларини тасаввур қилиш янада оғриқли”, – деб ёзади “Не  молчи” лойиҳаси.

Лойиҳа Ўзбекистонда бундай ҳолатлар кўплигини қайд этади.

“Ёш келин калтакланади ва ҳақоратланади, лекин унинг қариндошлари ёрдамга илтижосига жавоб беришмайди, қизи ва невараларини нафақат хавф остида, балки ҳақиқий дўзахда қолдиришади. Ахир, ажралиш уят-да, болангизни ҳимоя қилмаслик-чи – ҳурматга лойиқми? Қизингизни тирик ва бахтли кўришдан кўра, маҳалладаги гап-сўзларни тўхтатиш учун уни дафн қилганингиз яхшироқми?”, – дея савол беради “Не молчи” лойиҳаси.