Араб давлатлари Марказий Осиё ва Озарбайжон билан ҳамкорлик қилишга тайёр

Араб давлатлари Араб иқтисодий ҳамкорлик форумининг учинчи йиғилишида Марказий Осиё ва Озарбайжон билан ҳамкорлик қилишга тайёрлигини билдирди. Доҳадаги тадбирда иштирокчилар ҳар томонлама стратегик ҳамкорлик ва ривожланиш тамойилларига содиқлигини яна бир бор тасдиқладилар.

Форумда ташқи ишлар вазирликларининг раҳбарлари, молия, савдо ва иқтисодиёт вазирлари иштирок этди. Улар барча мавжуд низо ва инқирозларни сиёсий йўл билан, давлатларнинг миллий суверенитети ва ҳудудий яхлитлигини ҳурмат қилган ҳолда, ички ишларга ташқи аралашувсиз ҳал қилиш зарурлигини билдирдилар.

Форум иштирокчилари соғлиқни сақлаш, киберхавфсизлик, экстремизмга қарши курашиш, сув ресурсларидан самарали фойдаланиш ва иқлим ўзгаришига қарши курашиш каби турли соҳаларда, шунингдек, транспорт инфратузилмасини ривожлантириш ва бошқа кўплаб соҳаларда ҳамкорликни ривожлантиришга чақирди.