Асли украиналик қиз “Япония гўзали” танловида ғолиб бўлди. Японияликлар бундан норози

Украинанинг Тернополь шаҳрида туғилган Каролина Сиино шу йилги “Япония гўзали” (“Мисс Япония”) гўзаллик танлови ғолиби деб эълон қилинди. Бу Японияда туғилмаган иштирокчи танловда ғалабани қўлга киритиши билан боғлиқ биринчи ҳолатдир, деб ёзади BBC.

Каролина 1998 йилда оддий украин оиласида дунёга келган, аммо кейинроқ, беш ёшида, онаси японияликка турмушга чиққанидан кейин Нагояга кўчиб кетишган. 2022 йилда мамлакат фуқаролигини олгач, “Япония гўзали” танловида қатнашишга қарор қилган.

Аммо жамоатчилик унинг ғалабасига турлича фикр билдирмоқда: баъзилар буни замонавийлик рамзи деб атаётган бўлса, айримлар “Япония гўзали” бошқача қиёфага эга бўлиши кераклигини даъво қилмоқда.

“Танланган Япония гўзали Японияга умуман алоқадор эмас. У бутунлай украиналик. Тўғри тушунинг, у жуда жозибадор, аммо танлов номи ‘Япония гўзали’. Бу ерда япон моҳияти қани?” — дея одамлар ижтимоий тармоқларда ёзмоқда.

Баъзилар Каролинанинг ғалабасида япон қиёфасига нисбатан дискриминацияни кўрди. “Япония гўзали сифатида европача қиёфага эга қизнинг танланиши нотўғри деб ўйлайман”, — дейилади яна бир изоҳда.

Шунингдек, украиналик моделнинг танланиши сиёсий мақсадга эга экани ҳақидаги тахминлар ҳам бўлди. Бироқ “Япония гўзали Гран-при” танлови бош ташкилотчиси Ай Вада Каролинанинг ғалабаси адолатли бўлгани ва у бунга лойиқ бўлганини таъкидлади. “У ҳам ёзма, ҳам оғзаки нутқда япон тилини юқори даражада билади. У кўпчилигимиздан кўра кўпроқ япондир”, — деди Вада.