“Агар Украина ютқизса, НАТО Россия билан жанг қилади” — Пентагон раҳбари

АҚШ мудофаа вазири Ллойд Остин Украина мағлубиятга учраган тақдирда, Россия билан НАТО қўшинлари жанг қилишини айтди. Бу ҳақда у АҚШ Конгресси Вакиллар палатаси Қуролли кучлар масалалари бўйича қўмитада унинг январ бошида касалхонага ётқизилишига бағишланган эшитувларда маълум қилди, деб ёзади Meduza.

“Агар Украина ютқизса, Путин тўхтамайди, у ўз қўшниларининг суверен ҳудудига ҳужум қилиб, эгаллаб олишда давом этади. Агар сиз — болтиқбўйи мамлакати бўлсангиз, кейинги нишон сиз бўлишингиздан жуда хавотирланяпсиз. Шунинг учун ҳам улар Путинни, унинг нималарга қодирлигини билишади. Очиғини айтганда, агар Украина мағлуб бўлса, мен ҳақиқатан ҳам НАТО Россия билан жанг қилади, деб ўйлайман”, — деди у.

Ллойд Остиннинг гаплари юзасидан Россия ТИВ расмий вакили Мария Захарова изоҳ берди. “Бу Россияга қаратилган тўғридан тўғри таҳдидми ёки Зеленский учун баҳона ўйлаб топишга уринишми? Униси ҳам, буниси ҳам тентаклик. Лекин ким агрессор эканлигини энди ҳамма кўряпти — бу Вашингтон”, — деб ёзди у ўз Telegram-каналида.