Россия авиацияси Белгород областида яна иккита бомбани “тушириб қолдирди”

Россия самолётлари Белгород областига иккита авиабомбани “тушириб қолдирди”, дея хабар беради ASTRA манбаларга таяниб.

Безимено қишлоғи ҳудудида 28 март куни эрталаб фугасли авиабомба (ФАБ-250) топилди. 140 дан ортиқ қишлоқ аҳолиси бир суткага эвакуация қилинди, кечқурун эса бомба олиб чиқиб кетилди ва йўқ қилинди. Иккинчи ФАБ-500 бомбаси Нечаевка қишлоғида топилган. Қишлоқ аҳолиси эвакуация қилинмаган.

Россия ҳарбий самолётлари мунтазам равишда Украинага учиб ўтаётганда ўқ-дориларни “тушириб қолдиради”. Кўпинча воқеалар Белгород областида содир бўлади. 22 февраль куни ФАБ-250 Солоти қишлоғига тушган, у портламаган, кейинчалик полигонда йўқ қилинган. 27 январь куни эса Корочанский районидаги Постников қишлоғида ФАБ-250 топилганди.