Зеленский Залужнийни ишдан бўшатиш нияти борлигини тасдиқлади

Украина президенти Владимир Зеленский мамлакат қуролли кучлари бош қўмондони Валерий Залужнийни ишдан бўшатиш нияти борлигини тасдиқлади. Бу ҳақда у Италиянинг Rai1 телеканали эфирида маълум қилди.

Айни вақтда у нафақат Залужнийни, балки бошқа раҳбар шахсларни ҳам лавозимидан бўшатиш ҳақида ўйлаётганини қўшимча қилди.

“Албатта, қайта юклаш ва янгидан бошлашга зарурат бор. Бу ҳақда гапирганда мен нафақат ҳарбий соҳадаги, балки давлатдаги бир қатор раҳбар шахсларни ҳам алмаштиришни назарда тутяпман. Мен (Залужнийни) алмаштириш ҳақида ўйлаяпман, бу ҳақиқат. Бу масала мамлакат машинасини бошқараётган бутун бошқарув гуруҳига тегишли”, — деди Зеленский.

Украина ОАВлари 29 январь куни кечқурун Валерий Залужний Украина ҚК бош қўмондони лавозимидан истеъфога чиққани ҳақида ёза бошлади. Бир қатор манбалар Залужнийнинг истеъфоси ҳақида келишилгани, аммо ҳозирча буйруқ билан расмийлаштирилмаганини маълум қилган бўлса, бошқалари буйруқ имзолангани, бироқ оммага эълон қилинмаганини даъво қилди.

2023 йил кузидан буён Украина ва чет эл ОАВларида гўёки Зеленский ва Залужний ўртасида бўлган зиддиятлар муҳокама қилинмоқда. Украина президенти офиси зиддиятларни рад этди, у ҳақдаги мишмишларни эса Россия олиб бораётган ахборот урушига йўйди.

Аввалроқ Залужний Зеленскийга уруш боши берк кўчага кириб қолганини билдирганди.

Шунингдек, Киев Оқ уйни Залужнийни ишдан бўшатиши ҳақида хабардор қилгани, аммо АҚШ бу қарорни қўллаб-қувватламагани хабар берилганди.