Қарши шаҳридаги “Ватанпарварлар боғи”да Иккинчи жаҳон урушига бағишланган ноёб ер ости музейи жойлашган.

Музей 2018 йилда очилган. Унинг ер остида жойлашиши тасодиф эмас. Шу йўл билан ташкилотчилар ҳарбий йиллар муҳитини ва аскарларнинг ҳаёт шароитларини ҳис қилиш имконини яратган.

Музейда кийим-кечаклар, қурол-аслаҳа, озиқ-овқат, ҳарбий техника тақдим этилган.

Эслатиб ўтамиз, Ўзбекистоннинг олти миллионлик аҳолисидан урушга 1,5 миллиондан ортиқ киши кетган. 600 мингдан ортиғи яраланган, 400 мингдан зиёди фронтдан қайтиб келмаган.

Уруш йилларида 120 минг нафар ўзбекистонлик орден ва медаллар билан тақдирланган. 338 нафар киши Совет Иттифоқи Қаҳрамони унвонига сазовор бўлган. 53 та аскарга Шуҳрат ордени кавалери номи берилган. Бир неча минг ватандошимиз Италия, Франция, Англия, Югославия, Польша, Венгрия ва бошқа мамлакатларнинг ҳарбий мукофотлари билан тақдирланган.