Ўзбекистон Яманда сулҳ ва ўт очишни тўхтатиш эълон қилинганини олқишлайди

Ўзбекистон Республикаси Яманда БМТ воситачилигида икки ойлик сулҳ ва ўт очишни тўхтатиш эълон қилинганини олқишлайди. Бу ҳақда Ўзбекистон ТИВ матбуот котиби хабар беради.

«Ҳарбий ҳаракатларга вақтинчалик мораторий, шунингдек, ушбу мамлакатда қонунийликни таъминлаш учун кўрсатилган қатъият Яманда кенг қамровли тинчлик ва барқарорликни ўрнатиш йўлида муросага эришиш учун зарур шарт-шароитларни яратади деб ҳисоблаймиз. Биз барча курашаётган томонларни ихтилофни мулоқот ва дипломатик йўл билан ҳал қилиш учун вазмин бўлишга ва сиёсий ирода кўрсатишга чорлаймиз», – дейилади хабарда.

Cулҳ келишуви 1 апрель куни имзоланганди. Нью-Йоркда журналистлар билан суҳбатда БМТ Бош котиби Антонио Гутерриш махсус элчи Ханс Грундбергга ҳамда Яман ҳукумати, Саудия Арабистони бошчилигидаги коалицияга ва ҳуситларга миннатдорчилик билдирди.

«Бу сулҳ Ямандаги вайрон қилувчи урушни тугатиш йўлидаги биринчи қадам бўлиши керак», – деди Бош котиб.

Етти йилдан ортиқ вақт давомида Яман Саудия Арабистони бошчилигидаги ҳукуматпараст коалиция ва исёнчи ҳусит гуруҳлари ўртасида қуролли қарама-қаршиликлар майдони бўлиб қолмоқда. 

«Яман халқи қанчалик азоб чекаётганини тасаввур қилиш қийин, чунки матбуот уларга етарлича эътибор бермаяпти. Уруш дунёдаги энг даҳшатли гуманитар инқирозлардан бирига олиб келди, мамлакатнинг давлат институтларини таназзул ёқасига олиб келди, инсоният тараққиётини йигирма йил орқага тортди, у минтақавий тинчлик ва хавфсизликка таҳдид солмоқда», – деди Антониу Гутерриш.

Томонлар Яман ичида ва унинг чегаралари яқинида ҳаво, қуруқлик ва денгиздаги барча ҳужум операцияларини тўхтатишга келишиб олдилар. Улар, шунингдек, ёнилғи кемалари Ҳудайда портига киришини, тижорат рейслари эса Сана аэропортидан амалга оширишини келишиб олдилар. Томонлар БМТ шафелигида учрашиб, Таиз ва Яманнинг бошқа вилоятларидаги йўллар очиш масаласини муҳокама қилишни ҳам келишиб олдилар. Томонларнинг розилиги билан сулҳ икки ойлик муддатдан кейин узайтирилиши мумкин.